Vizêr roniştişê dewaya qetilkerdişê Pinare Gultekîne ame kerdene û roniştiş de di kesî vera dîyayî, têna cezaya 23 serran dîyaye kesêkî. Cinîyan Mugla de roniştişî ra dima birê mehkeme bi rayraşîyayîşêkî şermezar kerdî.

Rayraşîyayîşî ra verî Wekîla HDPyî ya Îzmîrî Serpîle Kemalbay verê Edlîyeya Mugla de derheqê dewa de qisey kerd. Serpîle Kemalbay qiseykerdiş de bale ante sîstemê huqûqî yê xeletî ser û vat: ''Nê birî yenê manaya 'wa camêrdî cinîyan bikişê, ma zî înan vera bidê.' ''

Cinîyan seba ke eşkerayîyêke bidê bi sloganan dest pê rayraşîyayîşî kerd, barîkatê polîsan derbaz kerdî û sloganê sey 'Ma do hesabê Pinare pers bikerê', 'Cinîye, Cuye, Azadîye' vatî.

Nameyê Platformê Seba Pinare Gultekîn Edaletî ser o Denîze Uslu qisey kerd û îfade kerd ke nê birî mojnenê ke edalet merdo. Denîze Uslu vat: ''Ma do peyê nê dadger û vergûmananê bînan canêverdê. No dadger zî şirîkê cînayetî yo.''