Komîsyonê Cinîyan ê KNKyî bi nameyê cinîyan ê kurdan seba ke Sekreterê Pêroyî yê NATOyî  Jens Stoltenbergî rê bêrê şawitene kampanyaya îmzayan daye destpêkerdene. Cinîyan mektuba eşkera nuşte ke wa şerê vera kurdan bêro vindarnayene.

Mektube de nê ameyî vetene:

''24ê nîsana 2021î de serrgêra Qirkerdişê Armenîyan de dewleta tirke Başûrê Kurdîstanî de dest pê operasyonê îşxalî kerd. Tirkîya tem serrgêra Qirkerdişê Armenîyan de mesajê ma do şima zî qir bikerê da şarê kurdî. Coka ma na kampanyaya îmzayan daye destpêkerdene. Seke şima zî zanê Tirkîya 70 serrî yo endama NATOyî ya. Organîzasyonanê globalî yê tewr pîlan ê dinya ra yew NATO yo. Hêzê NATO esto ke meseleyan çareser bikero. Xora berpirsîyarîya NATOyî esta ke bingeyê haştîye bîyaro ra û bipawo. Çunke NATO hela ke xo dano naskerdene vano o ercanê demokratîkî rê teşfîk keno. Îlkeyanê xo de vano pênêkerdişan bi metodanê haştîkî çareser keno. La NATO Tirkîya ke 70 serrî yo endama ciya vera hêrişê îşxalê ci bêveng mendo.

Tirkîya têna îşxal nêkena, cayanê îşxalkerdeyan de qirkerdişê cinîyan kena. Hukmatê AKPyî hem Tirkîya de hem zî teberê sînorî de qirkerdişê cinîyan keno. Sere de Efrîn de, Gresipî û Serêkanî de pê metodanê tacîz, tecawuz, talan, remnayîş, qetilkerdiş qirkerdişê cinîyan kenê. Raporê Neteweyanê Yewbîyayeyan ê derheqê Efrînî yê 2020î de na polîtîkaya qirkerdişê vera cinîyan a dewleta tirke sey 'dehşetayîş' ameye namekerdene. Polîtîkaya îşxalî ya dewleta tirke goreyê şertanê NATOyî nîya. Dewleta tirke qaydan binpay kena. Ma sey cinîyan ê kurdan veng danê NATOyî ke endama ci dewleta tirke ya ke qaydanê NATOyî binpay kena, wa vindarno.''

Na kampanyaya îmzayan 07.05. 2021 de hetê Komîsyonê Cinîyan ê KNKyî ra ameye destpêkerdene. Di hewteyî îmzayî do bêrê arêdayene û dima ra Sekreterê Pêroyî yê NATOyî rê bêrê şawitene.