Xeylêk bajaranê Kurdîstan û Tirkîya de cinîyî vera betalkerdişê Peynana Îstanbulû vejîyayayî meydanan û polîtîkaya hêrişkare ya hukmatî ya vera cinîyan şermezar kerde.

Îstanbul de cinîyî Tunelê Taksîmî ra rixmê astengîyan ver bi Karakoyî şîyî. Îstîklal de polîsan hêrişê cinîyan kerd. Cinîyan sloganê sey 'Ma Peymana Îstanbulî ra fek vera nêdanê', 'Cinîye, cuye, azadîye' vatî. Karakoy de zî ppolîsan reyna verê cinîyan girewt la cinîyan barîkatan ra derbaz kerd. Cinîyî warê Karakoyî de roniştî û vat: ''Naye rapey her roje 1ê temmuz a, her roje serewedaritiş a.Ma do peymana Îstanbulî bîyarê ca.'' Çalakîye pê sloganan qedîyaye.

Amed de Parka 8ê Martî de rayberîya Komeleya Cinîyan a Rosa de eşkerayîyêke ameye dayene. Xeylêk cinîyî tewrê eşkerayîye bîyî. Cinîyan çalakîye de sloganê sey 'Cinîye, Cuye, Azadîye' û 'Biciwîyo paştdayîşê cinîyan' vatî. Eşkerayîye de ame vatene ke ê betalkerdişê Peymana Îstanbulî qetî qebul nêkenê. Eşkerayîye ra dima endamê komele Rûkene Erguneş deklarasyonêk wend ke morê 129 dezgeh û rêxistinanê komelî tede yo.

Dêrsim de zî endamanê Platformê Cinîyan ê Dêrsimî Meydanê Seyîd Rizayî de eşkerayîyêke daye . Cinîyan ard ziwan ke pê betalkerdişê Peymana Îstanbulî verê şîdetê serê cinîyan ame akerdene. platformî venga pêro cinîyan da ke seba pawitişê peymane û heqanê xo wa têkoşîn bikerê.

Reyna bi eynî waştişî xeylêk bajaranê bînan ê Kurdîstan û Tirkîya de cinîyê ke vejîyayayî kuçeyan vera qîtîdarî sere wedarit û vat ê do rixmê heme hêrişanê camêrd-dewlete do peyser game mewerzê û têkoşînê xo pîlêr bikerê.