Îran de cinîya kurde Mehsa Emînîya 22 serre 13ê êlule de hetê 'polîsanê exlaqî' ra tepişîyabi, îşkence dî û hîrê rojan ra dima nêweşxane de dinyaya xo bedilnabî. Qetilkerdişê Jîna Mehsa Emînî ra dima xeylêk şaristanan de çalakîyî dîyayî destpêkerdene. Cinîyan bi sloganê 'Eke gijik nêbo, gune zî çin o' gijikê xo pa kerd.

Xeylêk şaristananê Îranî de kesê namdarî zî vejîyayî meydanan, înan laçikê xo vetî û hêrsê xo vera hukmatê Îranî mojna.

Rêxistinanê komelê sivîlî yê kurdan seba grevê pêroyîyî veng da. KODAR, PJAK Û KJARî de bi eşkerayîyan venga şarê Rojhelatî û Îranî da ke waştişanê meşrûyan ê cinîyan rê paştî bidê.

Partîyanê pabesteyê Merkezê Hemkarîye yê Partîyanê Kurdîstanê Îranî, Rêxistina Kurdîstanî ya Partîya Komunîste ya Îranî û rêxistinanê komelê sivîlî yê Rojhelatê Kurdîstanî zî seba grevê pêroyîyî veng da.