Almanya de cinîyan qetilkerdişê Jîna Emînî protesto kerd û xoverdayîşê cinîyanê Îran û Rojhelatê Kurdîstanî selam kerd.

Kassel de cinîyan ê kurdîstanijan û almanan mîtîngêk viraşt. Mîtîng de cinîyan pê sloganê 'Cinîye, Cuye, Azadîye' paştî daye cinîyanê Îranî û Rojhelatê Kurdîstanî.

Hannover de çalakîya protestoyî de cinîyan xoverdayîşê vera qetilkerdişê Jîna selam kerd û seba tewrbîyayîşê çalakîya ewroyîne veng da. Çalakîye pê sloganan qedîyaye.

Luneburg de endamanê TJK-E û enternasyonalîstan findî nayî ro û Jîna yad kerde. Dima pê fotografanê Jîna çalakîya protestoyî kerde. Qiseykerdişan de ame vatene ke ganî cinîyî dormeyê têkoşînê hemparî de bêrê yewca.

Stuttgart de çalakîkeran fotografê Jîna kiriştî, sloganê 'Cinîye, Cuye, Azadîye' vat û gijikê xo qesna. Qiseykerdişan de ame vatene ke ganî cinîyî şîdetê  vera cinîyan vengê xo hîna berz bikerê. Çalakîye pê sloganan û goşdarîkerdişê muzîkî qedîyaye.