Cinîyan ê Çewligî dest pê amadekarîya zimistanî kerd. Dewa Rîzî ya qezaya Dara Hênî ya Çewligî de cinîyî ameyî pêser û pîya amadekarîya xo ya zimistanî kenê. Dewa Rîzî pê erdê xo yê bereketînî şinasîyena, dewe de tewir bi tewir sebze û meyweyî resenê.  

Cinîyanê Rîzî derheqê amadekarîyanê xo de Jinnewsî rê qisey kerd. 

Elmase Turhalliya ke dest bi amadekariyê zimistanî kerda, vat ke çîyo ke ma înan zaf aciz keno salçe yo û wina qalkerdişê xo rê dewam kerd: “Dima ke firingiyê ma sûr benê ma înan kom kenê. Dima ra ma înan teştê pîlan de werdê kenê. Semedo ke awa xo bidê teber, ma sole kenê û rojêke vindarnenê. Dimayê nê ma ê firîngîyê ke vindenê, awa înan seba tena bimano ma kakilê înan mîyanê awe ra vejenê û awa înan kenê beroşê pîlî û gêrnenê heta ke bêro xo. Eke hawa germ bo hîrê rojan de salçe virazîyeno. La gama ke germ nêbo zî 5-6 rojan de salçeyê ma amade beno.”

Elmase dîyar ê viraştişê salçeyî ra ber îsot û balîcanan zî wişk kenê û vat: “Sewbîna ma eşkican zî virazenê. Eşkicê ke ma engure ra arê kenê û verê tîjî de fînenê ra virazênê. Dimayê ke engurê ma ziwa benê û benê eşkic  ça çiqilê înan tira kenê û semedê zimistanî verdenê. Ma zimistanî zî nê eşkican ra xoşav viraznenê. Engura ma ke ma kenê bastêq û dims zî cîya ya. Dimayê ke engura ma bena xişn ma şîreyê ci vejenê û girnenê û kenê dims û pê bastêq viraznenê. Dims û bastêqê xo ma zimistanî wenê û oyo ke mendo roşenê û semedê ma beno çimeyê debare.”

Elmase tewr peyîn qala zehmetîya karê xo zî kerde û vat: “Karê ma zaf zehmet o. Ma bi saetan  û bi rojan serê lingan de vindenê. Reyan paşta ma dejena. Sewbîna karê ma bi germbîyayîşê hamnanî tewr zehmet beno. La rixmê nê zehmetîyan ma wayîrê kultur û adetê xo vejîyenê û amadekarîya zimistanî rê dewam kenê.”