Şaristanê Bîlbao yê Baskî de konferansê tevgêrayîşê femînîstan ê 5. ame serûberkerdene.

Konferansî 3 rojî dewam kerd û pêro herêmanê Baskî ra 3 hezar cinîyî tewrê konferasnî bîy.

Hûmarêka cinîyanê Katalonya û welatanê Amerîkaya Latîne zî tewrê konferansî bî.

Roja hîrêyîne ya konferansî de mesajê verfeka YPJyî Nesrîn Ebdullahe bi rayîrê vîdeokonferansî ame pêşkêşkerdene.

Nesrîn Ebdullahe selam da pêro beşdaranê konferansî û înan rê sipas kerd ke paşt danê destpêkê şorişê înan.

Ebdullahe hêvîya xo arde ziwan ke vera barbarîya Erdoganî ya ke Rojawan de keno, vengê xo berz bikê û paştdayîşê xo dewam bikê.

Beşêkê bîn ê konferansî de bi wesîleyê Roja Rojawanî ya Dinya cinîyan pankartêko pîl amade kerd ke ser o nuştêne “ê heman çeperê xoverdayîşî de yê.”

Beşdarê konferansî sloganê "Cinîye, cuye, azadîye", "Biciwîyo tevgêrayîşê Kurdistanî" û "Biciwîyo tevgêrayîşê femînîstan" vatî.

Heman wext de alayê YPJ-YPG'yî û Kongreya Starî ameyî berzkerdene.