Dewleta tirke her roje cinîyan ê kurdan destbend kena û tepişnena. Bi taybetî nezaretan de cinîyê kurdî maruzê teda benê. Hewteyê verênî zî xeylêk aktîvîstê Têgêrayîşê Cinîyan ê Azadan (TJA) ameybî destbendkerdene. Hemsereka OHDyî ya Amedî Av. Ozume Vurguna ke avûkatîya aktîvîstan kena çimdarîyanê xo ser o qisey kerd.

Ozume Vurgun pare kerd ke dosyaya destbendkerdişî 'veng ê' û îfadeyan ra dima dosyayî yenê amadekerdene.

Avûkate Ozume vat: ''Destbendkerdişê nê 22 cinîyan de ma bi hawayêkê eşkerayî binpaykerdişê heqan dîyî. Wextê nezaretî yê înan ame dergkerdene, no bi xo binpaykerdişêk o. Cinîyan rê ame vatene îfade ra dima ê do bêrê veradayene. La wina nêbi.  Serê nê operasyonan de zî cinîyî estbî. Dewlete cinîyê terefgîrê xo û cinîyê xoverdayoxî ardî têvera. Polîsan cinîyan rê gef wend û heqaret kerd. Berê nezaretî nêameyî akerdene, cinîyî bênefes mendî. Cinîyî nêameyî berdene bi lawaboyan.''

Ozume da zanayene ke dosyayanê cinîyan de qet yew sebebê sûcî çinbi û vat: ''Coka polîsan cinîyan rê persê ecêbî pers kerdî ke pê ci cinîyan verguman bikerê. Mesele nînan cinîyan rê pers kerd ke TJA çita ya, aktîvîst çita ya ûsn. Reyna persê 'PKK rêxistinêka terorî ya' zî nînan ra yew o. Nê persî şexsî yê heqê polîsan çin o ke nê persan pers bikerê.''

Ozume bale ante ser ke polîsan bi taybetî vera Aktîvîsta TJA Zelale Bîlgîn kerdişê xirabî ardî ca û vat: ''Dosyaya dewaya Zelale Bîlgîn de KCD, Komeleya Rosa, KCK û TJA estê. La Zelale nêamebî tepiştene.  Polîsan xîret kerd ke Zelale embazanê ci ra cîya bikerê. No bi xo îşkence yo. Zelale Bîlgîn semedê nefretê amîrê polîsan tepişîyaye.''