Bi wesîleya nêzdîbîyayîşê serrgêra hêrişanê qirkerdişê 3ê tebexa 2014î ke çeteyanê DAÎŞî vera şarê êzidîyan kerd, cinîyê Şingalî vejîyayî kuçeyan semedê heqanê xo qîrayî.

Bi seyan cinîyê ke Suka Kevin de ameyî têhet fotografê qirkerdişî kiriştî û bi yerimanê sîyayan destê xo pê rêzilan girêdayî û bale ante cinîyê ke hetê çeteyan ra ameyî remnayene û ameyî kolekerdene ser. Cinîyan bi sloganan hêrişê qirkerdişî şermezar kerdî û xoserîya Şingalî waşte. Cinîyan veng da komelê mîyanneteweyî ke wa qirkerdişê vera êzidîyan û statuyê xoserî yê Şingalî bêro naskerdene.

Endama Têgêrayîşê Cinîyan ê Azadan ê Êzidîyan (TAJÊ) Fehîme Silmmanî vist vîrî ke bi hezaran cinîyî sey koleyan rayîr de ameyî rayraberdene û vat: ''Ma zaf dejo pîl dî. Seba ke ma reyna nê dejan mevînê ma wazenê xo bi xo îdare bikerê. Semedê pawitişê xo ma asayîşê xo na ro, ma hêzê xo yo leşkerî û rêxistinbîyayîşê xo yê cinîyan na ro. Ma wazenê ma statuyê xoserî bêro naskerdene.''

Badê rayraşîyayîşî cinîyan yerimî vetî sey çalakîya sembolîke rêzilî şikitî û yerîmî vêşnayî.