Cinîyanê çar parçeyanê Kurdîstanî vera hêrişanê dewleta tirke nêrazîbîyayîşê xo mojna. Cinîyan vera hêrişan venga pêro kurdan da ke wa pîya yewîya neteweyîye bîyarê ca.

Şaristanê Dêrikî yê Rojawanî ra Suade Mustafaya ke dadîya Hevrîne Xelef a bale ante girîngîya îtîfaqê kurdan ser û vat: ''Kurdî ganî bibê yew û vera xayînan û hemkaran têkoşîn bikerê. Ma pîya bedelê pîlî dayî coka ma pîya têbigêrê. Îşxalkerî vanê 'Ma vera PKKyî şer kenê.' La ê dişmenê pêro kurdan ê. Hînî wextê ci ameyo ke kurdî binê yew. Ganî ma sey dadîyan na babete de mesuldarîya xo bîyarê ca.'' 

Cinîya şirnexije Aynure Elçeoglu îfade kerd ke ganî kurdî pîya cewab bidê hêrişan û vat: ''Çar parçeyanê Kurdîstanî de vera kurdan hêrişê pîlî estê. Herinda ke ma şîn kenê ganî vera hêrişan xo ver bidê. Eke ma bibê yew eşkenê îtîfaqê xo ronê.''

Başûrê Kurdîstanî ra Esmere Resûl Elîm ard ziwan ke dişmenî tim xîret kenê ke yewîya kurdan asteng bikerê û vat: ''Hêzê teberî hêrişanê vera kurdan de rolê xo kay kenê. Dişmen nêwazeno ma bibê yew. Ganî ma meseleyanê xo bi sereyê xo çareser bikerê. Bi taybetî ganî Hukmatê Herêma Kurdîstanî ganî pê vateyê îşxalkeran tênêgêro.'' 

Şaristanê Ûrmîye yê Rojhelatê Kurdîstanî ra Zîlane Rojhilat da zanayene ke paradîgmaya Abdullah Ocalanî tesîrê pêro dinya kena û vat: ''Kurdîstan de merdimî yenê qetilkerdene. La xêrê paradîgmaya Rayber Apoyî ra hêzêk vejîya werte. Ganî cinî, ciwan û pêro kurdî vera nê hêrişan xo ver bidê, yew bibê. Nika her wextî ra zêdêr ma hewceyê yewî yê.''