20ê gulane de serê rayîrê qezaya Pulurî ya Dêrsimî de cendirmeyan gama ke kontrolê nasnameyî kerdêne çeke darte sereyê cinîyêke. Dima ke şarê Dêrsimî vera leşkeran vejîya û nêrazîbîyayîş ramojna cinîya bi nameyê V. Y. destê înan ra ameye girewtene.

A roje ra nate vera şîdetê dewlete-camêrdî nêrazîbîyayîşî dewam kenê. Cinîyan ê Dêrsimî ke vera hêrişî hêrsê xo ard ziwan mesajê pîlkerdişê têkoşînî dayî.

Wendekare Ezgî Çelebî bale ante betalkerdişê Pêkerdişî Îstanbulî ser û vat: ''Eke cinîye bimerdayêne mesûldarê nayî kam bi? Seba ke nê pêkerdişî ra peyser ame antene camêrdî dahîna bicesaret hêriş kenê. Çîyo winayên nêno qebulkerdene. Ganî cinîyê vera nê nêrazîbîyayîş ramojne û  paştdayîşê xo pîlêr bikerê.''

Sultane Sariateş zî vera nayî hersê xo ard ziwan û vat: ''Seba ke merdiman bitersnê wina kenê, armancê înan çiyo? No qewimîyayîş eşkayêne bibo netîceyêke negatîfe. Cuya merdiman tehluke de ya. Na rewşe semedê her kesî bitehluke ya.''

Nazli Çelîk zî wina vat: ''Dêrsim de çi heyf her cinî eşkena caardişêkê winayênî  dir bêra rî bi rî. No travma vera pêro cinîyan o. Çîyo ke ameyo ciwîyayene bêehlaqîye yo. Wazenê ke mîyanê komelî de bêbawerîyêk awan bikerê. Bi serran o cuya cinîyan wina yena pelçiqnayene.''

Geyîke Murat zî vat: ''Serebûto ke ameyo ciwîyayene, çîyêko wina lêşin o ke merdim nêeşkeno qebul bikero. Armanc bêvengkerdişê şarî yo. Ganî şar têkoşîn bikero, sere wedarno û wirzo payan ser . Sewbîna rayîr çin o. Ganî ma nê sîstemî rê vajê hînî bes o û peynîya ci bîyarê.''