Zîndananê Tirkîya de binpaykerdişê heqanê tepişteyan dewam kenê. Sîyasetmedara dêrsimije Aysele Tugluka ke 2016 ra nara Zîndanê Kandira de tepişîyena rixmê nêweşîyanê xo yê giranan zî vera nêdîyena.

Vera rewşa Aysele Tugluk nêrazîbîyayîşî zêdîyenê.

Endama Meclîsê Cinîyan ê HDPyî yê Dêrsimî Yasemîne Soylemez pare kerd ke Aysele Tugluk seba ke kurd a û elewî ya hetê dewlete ra zîndan de tepişîyena. Soylemeze vat: ''Aysele Tugluk nêeşkena bi sereyê xo hewcedarîyanê xo peyda bikera. Ganî a teber de tedawî biba. Şexsê Aysele Tugluk de ganî pêro tepişteyê nêweşî bêrê veradayene.''

Hetkara Şaredarê Dêrsimî Canane Ay zî îfade kerd ke no kerdişê vera Aysele Tugluk metodêkê îşkenceyî yo û vat: ''Her hewte tepişteyê nêweşî zîndan de mirenê. Ganî nê tepişteyî cade vera bidîyê û tedawî bibê.''

Îdarekara EMEPî ya Dêrsimî Elîfe Ozer vat: ''Aysele Tugluk hêrişê nîjadperestî yê vera cenazaya dadîya xo ra dima bîya xirabêr. A nêeşkena zîndan de bimana. Dezgehê Tipê Edlî nêverdena a vejîya teber. No zî tedaya îqtîdarî eşkera keno.''

Sereka Şubeyê Dêrsimî ya DÎSKî Şukrane Yilmaz vat: ''Êyê ke vera tepişteyanê nêweşan yenê kerdene huqûqê dişmenîye yo. Tim seba wayûbiratîye sloganî yenê eştene la kurdî sey wayûbirayî nêhesibîyenê. Ganî Aysele Tugluk û pêro tepişteyê nêweşî azad bibê.''