Bi îmzaya Serekomarê AKPyî Recep Tayyîp Erdoganî 18ê tebaxa 2017î de taxa Fîskaya ya Yenîşehîrî ya Amedî sey wareyê birîskî amebî îlankerdene. Taxê Ferîtkoşk û Dîcle yê Fîskaya reyna pê babeta 'vurnayîşê şaristanî' rojdem de yê. Yeno waştene ke nê taxan de TOKÎ bivirazîyo.

Roniştoxanê cinîyan ê taxan Jinnewsî rê derheqê mesele de qisey kerd.  

Hacer Varan bi  serran o Fîskaya de ya, vat cayê înan bi xoza û kulturê xo cayêko cîya yo û bi nê projeyî  do kultur û xoza xira bibê.  Hacere wina vat: “Ez na taxe de ameya dinya. Ciwanîya mi tîya derbaz bîye. Ma her çîyê xo tîya ciwîyayî. Do awanîyê ke bêrê viraştene her çî bivurnê. Do kultur û xoza ma bêrê texrîbkerdene.” 

Hatune Gulen zî wina vat: “Dewlete seba ke ma keyeyê ma ra veja, ma xapênena. Dewlete verê ma cayê ma ra kerdî, dewa ma, keyeyê ma veşnayî. Ma mecbûr mendî ke koç bikerê. Rixmê hende feqîrî ma tîya de keye viraşt. Nika wazenê ma reyna koçber bibê. Nika zî seba ma keye ra vejîyê, pere pêşnîyaz kenê. Bi pereyo ke ê danê ne keye gêrîyeno ne zî ma eşkeno teqsîtêkê keyeyî bidê. Ma merdimê feqîr ê. Ez tena ciwîyena. Dewlete wazena xoza û çemê Dîcle seba menfaatanê xo bi xebitna. Wa dewlete destê xo serê cuya ma ra wedarna. Ez keyeyê xo ra nêvejîyena."

Hatune Yayika ke 45 serrî yo Fîskaya de ciwîyena vat: "Dewlete  wazena tîya xira bikera û vîlayan viraza. Dewlete keyeyê ke viraznena zî hewl dana ke ma rê biroşa. Dewlete seba menfaatanê xo tîya de keyeyan virazena. Şar feqîr o. Ma tena eşkenê tîya de debara xo bikerê. Ma nêeşkenê teqsîdan bidê. Ez û tûtê xo ma nêwazenê tîya birijîyo. Ma cayê xo ra kêfweş ê."

Eymene Aslan zî 50 serrî yo taxe de ciwîyena wina vat: "Wa keyeyê ma nêrê rijnayene. Merkez de keyeyî zaf vay ê. Îmkanê ma çin ê. Dewlete bi zor zî ma veja ma nêvejîyenê. Rixmo ke  tapoyê ma estê, wazenê ke ma vejê. Vîlayê ke dewlete virazena, zaf vay roşena. Ma bi tu hawa belgeyan îmza nêkenê."

Belkisa Vural zî wina vat: “Ez û di kênayê xo tîya de ciwîyenê. Ma cayê xo ra kêfweş ê. Gelo ma do merkez de senîn debara xo bikerê. Ma tîya rehet ê û bihuzûr ê. Wa dewlete huzûrê ma xira nêkera."

Hanim Can zî wina vat: "Ma nêwazenê keyeyê ma bêrê rijnayene. Ez nêeşkena merkez de debara xo bikerî. Ez tîya kêfweş a. Dewlete çira cayê ma rijnena. Sebeb çîyo?  Vejêna xeberan û vana, do hende pere bêro dayene. Hewl danê ke ma bixapênê û Fîskaya xira bikerê. Wazenê ma vila bikerê. Ma keyeyê xo nêdanê."