Cinîyê ke qezaya Sûrî ya Amedî de ciwîyenê îfade kenê ke ê serê sibayî ra heta şanî bilîyê keye û domanan benê la asayîşê înan o komelkî çin o. Cinîyan derheqê babete de Ajansê Mezopotamya rê qisey kerd.

Arzuye Çelîka 34 serre da zanayene ke a hema 18 serre bîye ameye zewijnayene û hertim karê keyeyî kena. Çelîke vat: ''Ameyoxê ma çin o. Ez 24 saetan nan pewjena, firaqan şuwena, keyeyî pakî kena. La keye de qezayêk bêro mi ser ez nêeşkena şora nêweşxane çunke sîgortaya mi çin a. Ez xanima keyeyî nîya kedkara keyeyî ya. Karê keyeyî hende rehet nîyê. Sey kedkarêka keyeyî ez zî heqanê xo wazena.Wa keda ma bêra dîyene.''

Huzyete Demîr (70)a ke nêmeyê emrê xo pê karanê keyeyî derbaz kerdo vat: ''Keye de her karî cinîyî kenê. Mi bi serran wina kerd. Mêrdeyê mi merd. Mi bi sereyê xo 10 domanî weye kerdî. 50 serrî ez keye de xebitîya la teqawutê mi çin o. Kar û xebatê camêrdan yenê dîyene la ê cinîyan nêdîyenê.''

Fatma Altuna 52 serre zî 40 serrî yo karê keyeyî kena. Fatma vat: ''înan wina musna ma; cinîyî karê keyeyî kenê, çîyêkê bînî nêkenê. Her kes xebitîyeno la keda ma nêna dîyene. Nameyê pêro cinîyan ser o ma sey karkeranê keyeyî heqê xo yê asayîşî wazenê.''