Rêxistinanê têgêrayîşê cinîyan ê sey Koma Çalakîye ya Femînîste (GAFA) û Femînîstanê Abya Yala (FAY) peynîya hewteyî de bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan Şilî, Meksîka û Ekvador de xeylêk çalakîyî kerdî. Çalakîyan de veng dîya ke wa her kes wayîrê xoverdayîşê Kurdîstanî vejîyo.

Arjantîn de çarçewa kampanyaya paştdayîşê bi têgêrayîşê cinîyanê Kurdîstanî de mesajê KJKyî ameyî wenden. 25ê Teşrîna Peyêne de şaristananê Buenos Aires, Cordoba û Rusairoyî de rayraşîyayîşan de sembolê Kurdîstanî ameyî kiriştene. Serkêşanê şarê Mapuche ra Mirta Curruhuinca rayraşîyayîş de pare kerd ke şarê kurdî û şarê înan heman çîyan vînenê û têkoşînê cinîyan ê kurdan seba înan çimeyê hêzî yo.

Bounes Aires de serkêşîya rêxistina Ni Una Menosî de bi wesîleya 25ê Teşrîna Peyêne rayraşîyayîş ame kerdene û seba paştdayîşê bi têkoşînê cinîyan ê kurdan mesajî ameyî wendene. Nameyê Ni Una Menosî ser o veng dîya ke bêvengîya hukmatan yena manaya hemkarîya dewleta tirke coka wa Arjantîn vera sûcanê şerî yê dewleta tirke têbigêro.

Cordoba de bi wesîleya 25ê Teşrîna Peyêne çalakîyêke ameye kerdene û Komîteya Paştdayîşê bi Têgêrayîşê Cinîyan ê Kurdan zî tewra çalakîye bîye. Mesaj de venga cinîyanê dinya dîya ke dewleta tirke bi hêrişanê vera Rojawanî xîret kena ke şorişê cinîyan çin bikera û ganî cinîyê dinya vera ney wurzê we.

Rosairo de rayraşîyayîşê 25ê Teşrîna Peyêne ra dima derheqê koçberîyanê Kurdîstanî de belgefîlmêk ame mojnayene û dima zî nameyê Komîteya Paştdayîşê bi Têgêrayîşê Cinîyan ê Kurdîstanî ser o qiseykerdişî ame kerdene. Qiseykerdişan de seba cigêrayîşê sûcanê şerî yê dewleta tirke veng dîya û hêrişê dewleta tirke yê vera Rojawanî ameyî şermezarkerdene. Çalakîye bi sloganê 'jin, jiyan, azadî' qedîyaye.

Çalakîyanê Yine Chako û Oaxaca de seba paştdayîşê bi kurdan afîşî ameyî daliqnayene û pankartê bi nuşteyê 'jin, jiyan, azadî' ameyî akerdene.