Têgêrayîşê Cinîyan ê Azadan (TJA) û Meclîsê Cinîyan ê Partîya Demokratîke ya Şaran (HDP) Amed û Wan de semedê wayrîvejîyayîş Pêkerdişê Îstanbulî çarçewa Kampamyaya ''Semedê cinîyan edalet'' de rayraşîyayîşî organîze kerdî.

Amed de cinîyî Çatê Dinya yê qezaya Peyesî de gerîyayî binê ablûqa. Badê muzarekeyanê çar saetan cinîyan eşkerayîye daye. Vervatoxa Meclîsê Cinîyan ê HDPyî Ayşe Acar Başaran bale ante ser ke polîsî bi saetan o ke cehd kenê ke vengê cinîyan bibirnê û vat: ''Barîkatanê ke semedê dişmen û qetilkaranê cinîyan nênanê ro semedê ma nayî ro. Îqtîdar reyna mojna ke dişmenê cinîyan o. La ê sekenê wa bikerê cinînî ne barîkatan ne zî rejîmê yew merdimî nas kenê. Şima cinîyî  mabênê çar dêsan de heps kerdî, tehdît kerdî la ma tim têkoşîn kerd. Şima tersayîş de heqdar ê çunke cinîyî do saltanatê şima birijnê.

Menga çeleyî ra nata 91 cinîyî pê şîdetê camêrdan ameyî qetilerdene. Bi desan cinîyî raştê tecawuzî ameyî, domanî îstîsmarî rê rî bi rî mendî. Cinîyî Pandemî de bêkar mendî û raştê şîdetî ameyî. Îqtîdar herinda berpirsîyarîya xo caardişî de cinîyan cuya komelkîye ra tan dano. Hêrişê vera Komeleya Cinîyan a Rosa  û TJA de 26 embazê destbend kerdî û înan 8 cinîyî tepişnayî. Sebebê nayî noyo ke wa cinîyî tewr 25ê Teşrîna Peyêne û 8ê Adare mebê. Vanê wa cinîyî keye de bêrê hepskerdene û hîrê domanan bîyarê dinya û sefalet de biciwîyê. La  ma rolê ke înan ma rê fasilnayo qebul nêkenê. Ma do cinîyê makulê ke ê wazenê wina nêbê û semedê caardişê pêkerdişî têkoşînî rê dewam bikerê. Ma pê qala yew merdimî destkewteyanê xo canêverdenê. Ma do pê slogan û tîlîyanê xo nê îqtîdarî birijnê û ê do bibe makul.''

Wan de zî cinîyî semedê wayîrvejîyayîşê heqanê xo kuçeyan de bî. Wekîlê HDPyî  û bajaranê Serhadî ra xeylêk cinîyî tewrê çalakîye bîyî. Cinîyê ke Kuçeyê Sanatî yê Rêya Armûşê  de ameyî têhet rîyê qedexeyê çalakîyan o ke 2016î nata yeno rayraberdene polîsan destûrê cinîyan nêda. Nayî ser o cinîyî bi sloganan ver bi banê HDPyî kewtî rayîr û tîya eşkerayîya çapemenîye daye.

Eşkerayîye de Wekîla HDPyî ya Agirî Dîlane Dîrayet Taşdemîr qisey kerd.Taşdamîre bale ante hêrişê îqtîdarî yê vera cinîyan ser û vat: ''Bitaybetî bajaranê kurdan de seba ke destkewteyê cinîyan destê înan ra bêrê girewtene her qeyde hêrişî yenê kerdene. Her roje operasyonê qikerdişê sîyasîyî yenê kerdene ke verê têkoşînê cinîyan bêro girewtene. Operaysonê vera Komeleya Cinîyan ê Rosa zî coka ame kerdene.  Ê se kenê wa bikerê cinîyî vera zextanê înan peyser game nêerzenê. Zere  de teber de her ca de ma   xo ver danê. Heta waştişê tepişteyanê ke grevê vêşanîye de yê bêrê ca ma do têkoşîn bikerê. Ma heta serkewtişî tim kuçeyan de bê. Îqtîdaro ke bi betalkerişê Pêkerdişê Îstanbulî dişmenîya xo ya vera cinîyan hewna mojna wa bizano ke ma do çirey destûr nêdê ke ê sîstemê xo yê nerî ronê.''