Cinîyê ke serkêşîya Şorişê Rojawanî kenê, xo amade kenê ke akademîya sîyasetê cinîyan ê demokratîkî awan bikerê. Cinîyê Rojawanê Kurdîstanî ekonomî ra heta hunerî, cuya komelkîye ra heta sîyasetî, ekolojî ra heta dîplomasî bi her hawayî xo rêxistin kenê û xurt benê.

Komîteya Dîplomasî ya ke 2012 de binê sîwana Yewîya Starî de ronîyaye, karanê dîplomasî yê cinîyan ra mesuldar a û seba têkoşînê hemparî û yewîya neteweyî ya cinîyan ê kurdan zî xebitîyena, sîstemê perwerdeyî aver bena. Komîteya Dîplomasî ya Kongreya Starî têna Qamişlo de nê Helebî ra heta Dêrikî wayîrê komîteyan a. 2013-2014 ra nata zî Lubnan, Ewropa û Başûrê Kurdîstanî de asta temsîlkarîye de xebitîyena. 

Temsîlkarîya Başûrê Kurdîstanî zî xîret kena ke destkewteyê sey averberdişê warê komelkî û sîyasî, sîstemê hemserekîye û qanûnanê cinîyan vila bikerê. Temsîlkarîya Ewropa têna Ewropa de nê Amerîkaya Latîne ra heta bi Asya wazena xo biresna pêro cinîyan.

Endama Komîteya Dîplomasî ya Kongreya Starî û Endama Meclîsî Menale Mihemed ard ziwan ke bi kedêka hempare ê resayî na aste û vat: ''Têna serê yew komîte ra qalkerdiş nêvejîyeno. Ney reyde komîteyê paştdayîşî yê teberê welatî, komîteyê dostanîye û rêxistinê dîplomasî yê cinîyanê kurdan zî mesuldarîyanê pîlan gênê xo ser. Ma seba daşinasnayîş û behskerdişê Komîteya Dîplmasî xebatê girîngî kerdî. Nê 10 serranê peyênan de ma averşîyayîşêko pîl vist dewre. Ma ancax se ra 10ê îmkanî şuxilnayî, tay kêmasîyê ma est ê. Ganî ma hîna zaf têkilîyî ronayêne. 

Amerîkaya Latîne û Ewropa de komîteyê 'Cinîyî Rojawanî Pawenê' est ê. Rojhelatê Mîyanênî de yanî cografyaya ma de mefhûmê sey hemserekîye, îdeolojîya xelisîyayîşê cinîyan, xopawitişî zaf nêzanîyenê. Nê waran de kêmasîyê ma est ê. Ganî ma kampanyayanê hîna hîra û aktîfan bikerê. Ganî warê dîplomasî xo aver bero, prosesî biercno û erk û wezîfeyanê xo goreyê prosesê sîyasî dîyar bikero û bîyaro ca. Eke wina nêbo ma do tim seyxo bimanê.''