Cinîyê kurdîstanijî yê Almanya hîrê serran ra pey Festîvala Cinîyan a Zîlane ya 16. şaristanê Frankfurtî ya Almanya de ameyî têhet. Festîvala bi şîarê 'Xo rêxistin bikerê, xo ver bidê, bi azadî biciwîyê' de cinîyan ê kurdan pê kincanê xo yê neteweyîyan şênayîyêke pêşkêş kerde. Xeylêk cinîyê enternasyonelî zî tewrê festîvale bîyî.

Festîvale de fotografê Aysele Dogan û Zeynepe Kinaci (Zîlane) ameyî daliqnayene.

Festîvale de standê kitab, kinc, zîynet û werdî ameyî akerdene. Reyna çarçewa festîvale de xeymêke ameye akerdene û cinîyanê dengbêjan na xeyme de kilamê xo vatî. Domanan zî warê xo de kêf kerd.

Festîvale de xoverdayîşê gerîlayan bi sloganê 'Biciwîyo xoverdayîşê gerîlayan' ame selamkerdene.

Dima Temsîlkara Women Defend Kurdistan û Vervatoxa YJK-E Aytene Kaplan qisey kerd. Hunermende Merale Alkan zî bi deyîranê bi kurdkî û tirkî coşê festîvale zêdîna.

Festîvala de mesajê Koordînasyonê KJKyî zî ame wendene. Mesaj de beşdarê festîvale ameyî selamkerdene û ame vatene ke wa festîvale biba wesîleya pîlkerdişê têkoşînî. Dewamê mesajî de bale ameye antene tecrîdê vera Rayberê Şarê Kurdî Abdullah Ocalanî ser û wina ame vatene: ''Milê ma rê bar a ke vera na tarîtîya faşîzmî ma her ca de têkoşînî pîl bikerê. Netîceya têkoşînê cinîyan de faşîzmê vera AKP-MHPyî ame qelskerdene. Cinîyê kurdî Zap, Metîna û Avaşînî de hê îşxalkeran bin visnenê. Wezîfeyê cinîyan no yo ke wayîrê nê xoverdayîşê gerîlayan vejîyê û têkoşînî pîl bikerê. Ma bi wesîle reyna xoverdayîşê bêhempayî yê gerîlayan selam kenê, venga şarê xo danê ke têkoşînê gerîlayan bikirişo her cayî.''

Cinîyan bi sloganê 'Cinîye, Cuye, Azadîye' cewab da mesajî.

Endama TJK-E Tuba Hezer zî festîvale de qisey kerd û vat: ''Şerê rûmetî barêka giran a. Ganî ma na bare bigêrê xo ser. Cinîyê kurdî vurîyayî; hînî şorişî kenê. Fikrê azadîye hînî zerrîya ma de kok dayo, ma tira fek vera nêdanê. Ê şexsê Rayberîye de şarî tecrîd kenê û wazenê fikrê Rayberîye nêresê şarî. La netîceya tewir, xoverdayîş û têkoşînê ma de îqtîdarê AKP-MHPyî ho rijîyeno. Ê pê çeka kîmyewîye û destekê NATOyî hêrişê gerîlayan kenê. La nê xîretî pûç ê. Ma do bi destê cinîyan Erdoganî muhakeme bikerê. Ya serkewtiş ya serkewtiş.''

Cinîyan temamîya festîvale de pê deyîranê Nûarîne, Bermale Çem û Çopî govende girewte. Festîvale pê govendan dewam kena.