Bado ke 23ê kanûne de paytextê Fransa Paris de hêrişê vera komela kurdan de hîrê aktîvîstê kurdî Evîne Goyî, Mîr Perwer û Abdurrahman Kizil ameyî qetilkerdene, her roje Paris de çalakîye yena kerdene. Vizêr zî cinîyî verê bînaya Wezîrîya Seyyewbînîye û Cinîyan a Fransa de ameyî têhet.

Cinîyê ke bi vengdayîşê Têgêrayîşê Cinîyan ê Kurdan ê Ewropa (TJK-E)  verê wezîrîye de ameyî têhet tîya mîtîngêk viraşt. Cinîyan dovîzê ke ser o ''Ma pêro Evîn ê'2 nuştebî kiriştî.

Badê rezgirewtişê semedê şehîdan aktîvîsta TJK-E Medya Botan qisey kerd. Botane vîst vîrî ke hem ake qirkerdişo ke des serrî verî ame kerdene nêameyo roşnkerdene, qirkerdişo bîn ame kerdene û vat: ''Ma sey Têgêrayîşê Cinîyan ê Kurdan ê Ewropa reyna veng danê dewleta Fransa û Yewîya Ewropa; eke şima nê qirkerdişan safî mekerê, şima do binê tohmetî de bimanê. Ma sey cinîyan û şarê kurdî ma do vera sîstemanê komploker û faşîstan heta peynî têkoşîn bikerê û ser bikewê. Wa çew cehd mekero ke pê mergî ma terbîye bikero. Ma do reçê Evînan de têkoşînê xo xurter bikerê.''

Yewîya Cinîyan ê Sosyalîstan ra Ayşe Yumlî Yeter zî bale ante têkoşînê cinîyan ê kurdan ê vera DAÎŞî ser û waşt wa qirkerdişî bêrê zelakerdene ke verê qirkerdişanê neweyan bêro girewtene.

Temsîlkarêka Konfedarasyonê Keda Neteweyîye  (Confédération Nationale du Travail-CNT) û Vervatoxa Koordînasyonê Cinîyan ê Neteweyîyî yê Fransa Suzy Rojtman zî qiseykerdişêk kerd.

Suzy Rojtman vat: ''Temsîlkara cinîyan ê kurdan ameye qetilkerdene ke tim hedef de bî.  Fransa nêeşekna vaja no hêrişêko nîjadperest o. No hêrişê terorî yo. Fransa ganî na herre de qet desturê hêrişêkî medo. Ganî kesê ke peyê nê hêrişî de yê vejo werte.  Nê prosesî de ma do heme çalakîyan de paştî bidê cinîyan ê kurdan.''

Mîtîng pê slogana ''Jin Jiyan Azadî'' qedîya.