Aktîvîstan ê cinîyan ê Başûrê Kurdîstanî derheqê kiştiş û şîdetê vera cinîyan û polîtîkayanê vera cinîyan de ANFyî rê qisey kerd.

Mesuldara Şubeyê Kerkûkî yê Sendîkaya Cinîyan Jîyane Hemîd îfade kerd ke xeylêk sebebê zêdîyayîşê şîdetî est ê û vat: ''Nê sebeban ra tayî xizanîye û xeletşuxilnayîşê medyaya dîjîtale. Netîceya şîdetê camêrdan de zî xokiştişî zêdîyene. La cinîyî zî nika vera şîdetî tewirê xo mojnenê. Verî cinîyî şermayêne ke bêrê dezgehanê ma. Cinîyê ke maruzê şîdetî manenê, domanê ke bi zorî dîyenê zewijnayene muracatê ma kenê. Ê wazenê hetê ma de bimanê la heyf ke yew keyeyê cinîyan ê ma çin o.

Wexto ke şîdet zêdîya, cîyabîyayîşî zî zêdîyayî. Wexto ke cinîyî wazenê mêrdeyan ra cîya bibê qanûnî yew heqî nêdanê înan û heqê camêrdan pawîyenê. Hişmendîya pederşahîye zaf tesîrê mehkemeyan kena.''

Yewîya Cinîyan a Kerkûkî ra Kurdîstane Xalid ard ziwan ke rixmo ke ê xîret kenê ke verê ci bigêrê cînayet û xokiştişê cinîyan zêdîyenê. Kurdîstane vat: ''Cinîyî wexto ke şîdetî vînenê muracatê asayîşî kenê la asayîş goş nêdano gerreyanê cinîyan. Qanûnê nikayênî têna camêrdan pawenê. Cinîyan rê ganî keyeyê bextwaştişî bêrê awankerdene ke tede bimanê.''

Mesuldara Şubeyê Kerkûkî yê Têgêrayîşê Cinîyan ê Azadan ê Kurdîstanî (RJAK) Dilvame Ekrem Mehmûd vat: ''Cînayetê cinîyan hînî bîyê serebûtê rojaneyî. Çunke mîyanê komelî de hişmendîya pederşahîye vila bena. Wexto ke cinîyî qetil benê yan zî şîdetî vînenê camêrdê sûcdarî  ya cezayêka şenike gênê yan zî mîyanê eşîran de mesele nimîyena. Ma kenê ke vera şîdetî cinîyan hişmend, komelî zî agahdar bikerê. Rêzefîlmê tirkan yenê dublajkerdene û nê rêzefîlmî mîyanê keyeyan de şîdetî vila kenê.''