Wendekara Zanîngehê Munzurî Gulîstane Doku ra 5ê çeleyê 2020î ra nata xeberêke nêna girewtene. Gulîstane Doku Dêrsim de ke 24 saetan bi kamerayan yeno teqîbkerdene 964 rojî yo vînîbîyaye ya.

Meclîsê Cinîyan ê HDPyî yê Dêrsimî ra Nurşate Yeşîl îfade kerd ke têkoşînê rêxistinanê cinîyan û keyeyî ra Gulîstane 964 rojî yo nêna vîrakerdene û vat: ''Gulîstane Doku seba cinîyan ê vînîbîyayeyan bîya sembol. Naye ra pey zî ganî ma bikerê ke Gulîstane vîran ra nêşora. Seba ke aqîbetê Gulîstananê bînan wina nêbo ganî ma têkoşîn bikerê. Serebûtê Gulîstane Doku de ma nê esasî ser o têkoşîn kenê. Wa cinîyê bînî nêrê vînîkerdene, qetilkerdene.''

Hetkara Şaredarê Dêrsimî Canane Ay zî ard ziwan ke Dêrsim her hele bi kamerayan yena teqîbkerdene la Gulîstane şaristanê winasênî de vînîbîyaye ya. Canane vat: ''No zî mojneno ke nê serebûtî de torrê xorinî est ê. Gulîstane Doku qestî ra ameya vînîkerdene. Seba ke têkilîyê gemarinî eşkera nêbê tehqîqatê nê serebûtî nêno averberdene. Ma heta peynî keyeyî reyde seba Gulîstane têkoşîn bikerê.''