17ê hezîrana 2021î de kesê bi nameyê Onur Gencerî eştbî binaya HDPyî ya Îzmîrî ser û Denîze Poyraz qetil kerdbî.  Roniştişê dewaya Onur Gencero ke Denîze Poyraz qetil kerdbî siba Îzmîr de Mehkemeya Cezaya Girane de dest pêkeno. Her hetê welatî ra bi bi seyan cinîyî seba ke tewrê roniştişî bîyî ewro kewenê rayîr.

Hemsereka HDPyî Pervîne Buldan, Grûba Meclîsî ya HDPyî, endamê Heyetê Rayberdişê Merkezî, endam û îdarekarê HDPyî zî do roniştiş teqîb bikerê.  HDPyo ke hedefê hêrişî bi seba 'beşdarîya umûmîye' do muracatê roniştişî bikero.

Serekê baroyan û bi seyan avûkatî zî do tewrê roniştişî bibê. Avûkatanê HDPyî bi eşkerayîyan dabî zanayene ke Onur Gencerî bi sereyê xo no hêriş nêkerdo, ameyo destekkerdene, MÎT û Asayîşî verê nê qirkerdişî nêgirewto û verê Gencerî akerdo.

Dima ke îqtîdarê AKP-MHPyî HDP kerdbi heden seba qefilnayîşê HDPyî mehkeme rê reya diyîne îdîanameyêk amebi dayene. Naye ra 10 rojan ra dima zî Denîze Poyraz amebî qetilkerdene. Gencerî îtîraf kerdbi ke ey waştêne bîna de hîna zaf kesan bikişo. Medyaya îqtîdarî zî no qirkerdiş sey ''Bînaya HDPyî de pêkewtişo çekdar'' dabi mojnayene.