Silopî de cinîyê ke seba Sakîne Kultura ke hetê Serekê Ocaxanê Têgêrayîşê Taybetî Îbrahîm Barkinî ra bi îşkence amebî kiştene, ameyî têhet vat ê do semedê cuya azade û seyyewbîne têkoşînê cinîyan xurtêr bikerê.
Serkêşîya Platformê Paştdayîşê Cinîyan ê Dayîke Taybete de qezaya Silopî ya Şirnexî de cinîyan eşkerayîyêke daye. Mayê Haştîye, aktîvîstê TJA, Meclîsê Cinîyan ê HDPyî zî tewrê eşkerayîye bîyî. Cinîyan fotografê Sakîne Kultur û dowîzê bi nuşteyê 'Cinîye, Cuye, Azadîye', 'Kişîyayîşê Cinîyan rê Ney' akerdî.
Endama Platformê Paştdayîşê Cinîyan Evîne Hasan eşkerayîye wende û îfade kerd ke Sakîne bi barbarî ameye qirkerdene. Evîne vat:''Şîdet û kişîyayîşê cinîyan meseleyêka komelkî ya. Bi taybetî wextê peyênî de herême de cinîyî hetê terefgîr û merdimanê îqtîdarî ra kişîyenê û sûcdarî bêceza vera dîyenê. Kiştoxê Sakîne ganî bi hawayêkê tewr giranî bêro cezakerdene. Ma wehşetê serê Sakîne qebul nêkenê û vera ney têkoşînê xo berz kenê.''
Cinîyan eşkerayîye ra dima çalakîya roniştişî kerde û sloganê sey 'Sakîne Kultur bêmerg a' vatî. Çalakîya roniştişî ra dima zî çalakîya rayraşîyayîşî dest pêkerd û cinîyan keyeyê Sakîne zîyaret kerd.
Serweşîye de Maya Haştîye Emîne Tatlici qisey kerd û ard ziwan ke vera polîtîkayanê dewlete yê serê cinîyan wa pêro cinîyî vejîyê waran û her ca de çalakîyan bikerê.
