Mehkemeya Îdarî ya Berze bire daye ke feshkerdişê Peymana Îstanbulî nêro betalkerdene. Naye ser o cinîyî vejîyayî waran û bire şermezar kerde. Cinîyan vat ê do Peymana Îstanbulî ra fek vera medê.
20ê adara 2021î de şewêke bi bira Erdoganî Peymana Îstanbulî amebî feshkerdene. Rêxistin, dezgehanê cinîyan û partîyanê sey HDPyî birafeshkerdişî berdbî Mehkemeya Îdarî ya Berze. Dayîreyê 10. yê Mehkemeya Îdarî ya Berze vizêr bire daye ke feshkerdişê Peymana Îstanbulî nêro betalkerdene.
Endamê Îstanbul de Platformê 'Ma do Verê Kişîyayîşê Cinîyan Bigêrê' (KCDP) seba şermezarkerdişê bira Mehkemeya Îdarî ya Berze Kadikoy û Beşîktaş de ameyî yewca. Cinîyan pankartê sey 'Ma bira nehuqûqîye nas nêkenê! Ma Peymana Îstanbulî ra fek vera nêdanê' akerdî. Çalakîye de sloganê sey 'Peymana Îstanbulî cinîyan pawena' ameyî vatene.
Sekretera KCDPyî Fîdane Ataselîm çalakîye de qisey kerd û pare kerd ê birêka sîyasîye ya mehkeme de têrî yê. Ataselîme vat: ''Peymana Îstanbulî eşkera her roje verê kişîyayîşê cinîyan bigêra. Nika ra pey erkê ma yo ke ma do nê têkoşînî rê bi hawayêkê rêxistinkerdeyî dewam bikerê. Pêro war û kuçeyî ê ma yê. Ma bira mehkeme nêşinasnenê. Hînî ma do hîna zaf têkoşîn bikerê. Seba erşawitişê nê îqtîdarî ma do bi hawayêkê rêxistinkerdişî têkoşîn bikerê.''
Îzmîr de zî cinîyan bi çalakîyêke bira mehkeme şermezar kerd û ard ziwan ke ê do Peymana Îstanbulî ra fek vera medê.
