Ronayoxanê Platformê Cinîyan ê Şahmerane yê Mêrdînî ra Eyleme Amak derheqê têkoşînê cinîyan de ANFyî rê qisey kerd.

Eyleme Amak vist vîrî ke menga adare de 28, nîsane de 16, gulane de 17, hezîrane de 20 cinîyî û menga tebaxe de 31 cinîyî hetê camêrdan ra kişîyayî. Eyleme Amak pare kerd ke têkoşînê vera şîdetê serê cinîyan rojdemo verên ê cinîyan o û vat: ''Têkoşînê cinîyan ê vera şîdetî bêmabên dewam keno. Ma sey cinîyan bêçare nîyê.

Vera neheqîya komelkî, sîyaseî, huqûqî, têdûştî û sîstemê serdestîya camêrdan cinîyî bi seyan serrî yo têkoşîn kenê. Ma vînenê ke têkilîya serdestîye û kolonyalîzmî ya vera cinîyan mîyanê komelî de zêdîyena. Coka hişmendîya azadî û cînsîye ya cinîyan azadkerdişê komelî de wayîra rolê serekî ya. Asta hişmendîya komelkîye ya têkoşînê xelisnayîşê cinîyan bii xurtî tesîrê vurîyayîşê hişmendîya komelkîye kena. Coka têkoşînê azadîye yê cinîyan ê kurdan têna têkoşînêko cînsî nîyo.''

Eyleme Amak ard ziwan ke cinîyî têkoşînê cînsî reyde rayberîya têkoşînê vera faşîzmî û sîstemê serdestîya camêrdan kenê û vat: ''Cinîyê kurdî warê îqtîdarî yê sîstemê serdestîya camêrdan lerznenê. Coka cinîyê kurdî maruzê teda û şîdetî benê. Bloko faşîst pê tepiştişê cinîyan ê kurdan wazeno sîyasetê demokratîkî hêzê rayberîye ra apey bivisno. Têkoşînê Azadîye yê Cinîyan ê Kurdan pê xoverdayîşî, pê bedelan ameyo awankerdene. Coka vera teda apey game nêerzeno.''