Cinîyan bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan Vakurê Kurdîstanî û Tirkîya de meydanan de mesajê têkoşîn û paştdayîşî dayî.

Amed

Merkezê Heqanê Cinîyan ê Baroyê Amedî de bi wesîleya 25ê Teşrîna Peyêne kombîyayîşê çapemenîye ame kerdene. Kombîyayîş de pankarta 'jin, jiyan, azadî' ameye akerdene. Eşkerayîye de şexsê şexsê Jîna Emînî, Nagîhan Akarsel, Pinar Gultekîn, Fatma Altinmakas, Îpek Er, Mûzeyyen Boylu, Meryem Sevîm de pêro cinîyê ke bi şîdetê dewlete-camêrdî ameyê qetilkerdene, ameyî yadkerdene û ame vatene ke vera şîdetê camêrdan têkoşînê cinîyan do dewam bikero.

Anqara

Merkezê Heqanê Merdiman ê Baroyê Anqara û Merkezê Gelîncîkî yê Baroyê Anqara panelêk kerd. Panel de têgêrayîşê cinîyan ame nîqaşkerdene. Panel de Prof. Dr. Serpîle Sancar bale ante ser ke HDP ra ber partîyanê Meclîsî de temsilîya cinîyan qels a. Komelnasa îranije Sara Baherîîad zî qala serewedaritişê cinîyan ê Rojhelatê Kurdîstanî û Îranî kerd. Panel de tepişîyayîşê muxabîranê Ajansê Mezopotamya û Jinnewsî zî ameyî virvistene û tedayê vera têkoşînê cinîyan ameyî nîqaşkerdene.

Mêrdîn

Têgêrayîşê Cinîyan ê Azadan (TJA) û Platformê Cinîyan ê Şahmaranî waşt çalakîya rayraşîyayîşî bikerê. Wekîlê HDPyî Peroye Dundar, Hemsereka HDPyî ya Mêrdînî Berîvane Bahçecî, îdarekarê HDP, DBPyî, Înîsîyatîfê Mayanê Haştîye zî tewrê çalakîye bîyî. Polîsan çalakîya cinîyan asteng kerde. Cinîya heta verberê bînaya HDPyî rayraşîyayîşê xo kerd û vera ablûqaya polîsan nêrazîbîyayîşê xo mojna. Dima hetê Îdarekara HDPyî ya Mêrdînî Ayşe Bozan ra eşkerayîye ameye wendene. Dima Peroye Dundar qisey kerd û vat: ''Ma reyna bezreyê azadîye eşt erdê xo. Ma vera nê hêrişan apey gamêke zî nêerzê.''

Colemêrg

Qezaya Geverî ya Colemêrgî de serkêşîya TJA de cinîyan waşt ver bi bînaya HDPyî şorê la polîsan xîret kerd ke cinîyan asteng bikerê. Cinîyan bi sloganê “Jin, jiyan, azadî” polîsî protesto kerdî. Wekîla HDPyî Nurane Îmîr uca de qisey kerd û vat: ''Polîsî vengê cinîyan rê tehamul nêkenê.'' Cinîyî rixmê astengîyan zî ver bi bînaya HDPyî şîyî. Polîsan xîret kerd ke cinîyî bi zorî debikerê bînaya HDPyî. Cinîyan bîna de şûmşînan ra sloganê sey “Jin, jiyan, azadî”, “Biji berxwedana jinan” vatî.

Mûş

Mûş de cinîyî bi beşdarîya Wekîla HDPyî Şevîne Coşkun bînaya HDPyî de kom bîyî. Cinîyan tîya de xoverdayîşê cinîyanê Îran û Rojhelatê Kurdîstanî selam kerd. Dima derheqê têkoşînê cinîyan de sînevîzyonêk ame mojnayene.

Erzirom

Qezaya Qereçanî ya Erziromî de cinîyan bi fotografanê Denîze Poyraz, Nagîhane Akarsel û Jîna Emînî waşt ke merkezê qeza şorê la polîsan hêrişê eşkerayîya cinîyan kerd. Cinîyan rixmê hêrişî zî bi sloganê “Jin, jiyan, azadî” rayraşîyayîşê xo kerd. Endama Meclîsê Partîye yê DBPyî Gulderene Varliya ke vera polîsan nêrazîbîyayîşê xo mojna ameye destbendkerdene.

Êlih 

Êlih de bi beşdarîya Vervatoxa Meclîsê Cinîyan ê HDPyî Ayşe Acar Başaran, Hemşaredara Êlihî Songule Korkmaza ke herinda ci de qeyûm amebi tayînkerdene, Meclîsê Mayanê Haştîye, Rêxistina HDP û DBPyî û aktîvîstanê TJA verê Sendîkaya Petrol-Îşî de eşkerayîyêke ameye dayene.  Eşkerayîye ra dima Ayşe Acar Başarane qisey kerd û îfade kerd ke ê do sey HDPyî tim vera şîdetê serê cinîyan  têkoşîn bikerê. Taxa Hîlalî de cinîyan eşkerayîye wende û dima çalakîya rayraşîyayîşî kerde.

Riha 

Qezaya Wêranşarî de serkêşîya TJA û Meclîsê Cinîyan ê HDPyî de cinîyan rayraşîyayîşêk kerd. Çalakîye de wekîla HDPyî Ayşe Surucu qisey kerd û da zanayene ke şîdetê vera cinîyan her ke şino zêdîyeno.  Ayşe Surucu pare kerd ke polîtîkayê dewlete hêz danê şîdetê vera cinîyan.   

Şaristan de Merkezê Heqanê Cinîyan ê Baroyê Riha zî keyeyê Şenyaşarî zîyaret kerd û paştî daye Emîne Şenyaşar.  

Semsûr 

Meclîsanê Cinîyan ê HDPyî û Partîya Çepe ya Keskan bînaya HDPyî de eşkerayîyêke daye. Eşkerayîye ra dima derheqê têkoşînê cinîyan de sînevîzyonêk ame mojnayene.

Dîlok 

HDP û TJA Dîlok de derheqê têkoşînê cinîyan de sînevîzyonêk mojna. Cinîyan aktîvîte ra dima sloganê "Jin jiyan azadi" berz kerd.

Bedlîs 

Bînaya HDPyî de Meclîsê Cinîyan eşkerayîyêke daye. Eşkerayîye de pankarta "Jin jiyan azadi" ameye akerdene. Eşkerayîye de Endama Meclîsê Partîye yê HDPyî Sîdare Karaçelîk qisey kerd û vat: ''Ma do tim bibê vengê Sakîne Cansiz, gijikê Jîna Emînî, qelema Nagîhane Akarsel.''

Sêrt

Bi beşdarîya Wekîla HDPyî Merale Daniş Beştaş cinîyan waşt ke eşkerayîyêke bidê la polîsan cinîyî girewtî binê ablûqa. Cinîyan bi sloganê "Jin jiyan azadi" û "Bijî berxwedana jinan" vera polîsan tewir mojna. Beştaşe zî polîsî şermezar kerdî û pare kerd ke cînayetanê polîsan de faîlo verên dewlet a.