Hatîce Altun Dadîya Apocîyan 13ê temmuza 2014î de surgun de Koln de şîye rehme. Dayîke Hatîce şahîda ronîyayîşê Têgêrayîşê Azadîye bîye û aye Hakî Karerî ra heta Mazlûm Dogan Kemal Pîr, Dogan Kiliçkaya, Hayrî Dûrmûş, Alî Haydar Kaytan û Cemîl Bayikî xeylêk Apogîrî keyeyê xo de kerdî meyman.

Tuzluçayir Anqara de tek taxe bîye ke Apogîrî dekewtêne mîyanê şarî. Cayanê perwerdeyî ra yew zî keyeyê Altunan bi.

Dadîya Hatîce wina qala ê rojan kena:

''Ez eslê xo de Dêrsimî ra ya. Ma Kayserî ra şîyî Tuzluçayir. Serê rayîrê NATOyî de ma xo rê banêk hêrîna. Ma waştêne wa domanê ma biwanê. Saît û Xezal wendêne la partîye ra dima înan wendişî ra fek vera da. Riza Tuzluçayir de bi şorişgêr, uca de zaf embazî estbîyî. Ciwanî ameyêne keyeyê ma. Nînan ra tay kesî şehîd bîyî.

Keyeyê ma şew û roje pirr bi. Serek ameyêne qisey kerdêne. Rojêke dima ke Serekî nan werd û çay şimit mi tira vat 'şo rakewe.' Ey vat 'Ti çira mi cîya kena?' Mi vat 'Embazî pêro vêşan ê, hetê to de nan nêwanê. Eke ti şore wenê.' O çax o şi.

Rojêke Kemal Pîr, Mazlûm Dogan ameyî. Ê nimitkî ra ameyî oda. Ez zî qulika berî ra ewnîyayêne. La înan ez dîya. Mi vat 'Mi waşt ez bivîna kamî ameyê.' La Rizayî nêverda. Dima ez şîya hetê Serekî, mi derdê xo ci rê vat. Riza ame mi rê va 'Ti çi ra peyê ma ra qisey kena?'

Rojêk ber cina. Domanî pêro keye de bîyî. Ez qerqilîya. Vatêne 'Berî ake.' Mi vat 'Eke şima vajê kam ê ez ber akena.' Înan vat 'Şîrkete keye de ya.' Ez şîya mi Riza şîyar kerd. Embazî zî şîya bîyî, qerqilîyayî. Ber abi, ê embazî bîyî. Înan bi çanteyêk çekî ardîbî. Ê keyeyê ma de zaf mendî. Heta 12ê Êlule di rojan de yew erzîyayêne keyeyê ma ser la mi nêverda ê çîyêkî bivînê. Mi çeke hol nimite, pê tonan mi çekî nimitî. Mi heta nika çekêke nêdaye dewlete, ez zaf çêr bîya.''

Lajêkê Dayîke Hatîce û di tornê aye şerê azadîye de şehîd bîyî. Lajê ci Haydar Altun 1991 de Heftanîn de operasyonêk de birîndar bi. Dima Amed de ci rê îşkenceyo giran ame kerdene û hetê dewleta tirke ra ame qetilkerdene.

Salîh Dogan Yildirim (Cumalî) 28ê tebaxa 2005î de qezaya Elbakî ya Wanî de şerê vera artêşa tirke de, Sînan Altun (Dogan) 21ê nîsana 2006î de Xinerê de bombardumanê dewleta Îranî de şehîd bîyî.

Pêro keyeyê Altunî tewrê têkoşînê bi, îşkence ra derbaz bi, maruzê surgun û zîndanî mend. Dayîke Hatîce Altun wexto ke Haydar esîr ame girewtene reya verêne vato 'Çîyêk îtîraf kerdo?' Wexto ke Haydar şehîd bîyo semedo ke keyfê dişmenî nêro nêberma. Wexto ke Cumalî tewrê Hêzanê Taybetan bi aye vato 'Salîhê mi tewrê fedayîyan bîyo ke vera dişmenî serê xo de bomba teqînenê.'

Wexto ke polîsê tirkî erzenê keyeyê înan ser wazenê fotografê Mahsum Korkmazî (Fermandar Egîd) bişiknê la Dayîke Hatîce verê înan gêna.

Kadroyanê rayberan ê PKKyî ra Riza Altun wina qala aye kena: ''Têkilîya ma ya bi aye cîya bîye. Êyê ke ameyêne Anqara yan zî waştêne ma de têkilîye virazê şîyêne keyeyê Dayîke Hatîce. O çax çalakîyî zaf bîyî. Ma a zî rêxistin kerde. A zî şîyêne çalakîyan û polîsan dir şer kerdêne. Rayêke Dayîke Hatîce Kemal Pîr ablûqaya polîsan ra xelisnaye. 12ê Êlule ra dima pê destpêkerdişê têkoşînê gerîlayan komanê verênan aye reyde têkilîye viraştêne. 1990 de a şîye Beka de Rayberîye dîye. A zaf reyî tepişîyaye, destbend bîye la qetî îtîrafêk nêda. Dima ke rewşe girane bîye a neçare menda ke şora Ewropa.''

6

Rayber Apoyî zîndanê Îmraliyî de eşnawit ke Dayîke Hatîce şîya rehme. O çax ey no îlan da Ozgur Gundemî:

''Pê dejê giranî mi eşnawit ke Dayîke Hatîce wefat kerda ke têkoşînê ma yê azadîye de ca û erjê ci nênê înkarkerdene. Dayîke Hatîce û xeylêk dadîyê ma serê ma û serê laj û kênayanê têkoşînî de wayîrê kedêka pîle yê. Dadîbîyayîşê înan zaf manadar bi.

Mi hertim bawer kerd û ez hema zî pê bawer a ke têkoşînê Kurdîstanî do pê keda dadîyan û fedakarîya domananê çêran ê Kurdîstanî do ser bikewo. Semedo ke aye bawerîya me kerd teze ez bi minet û hesrete aye yad kena, keyeyê ci yê ercîyayeyî û şarê ma rê serweşîye wazena. Bi rêzdarî.''

Roja verêne ra heta roja peyêne tek xeyalê Dayîke Hatîce bi: Dîyayîşê Kurdîstanê Azadî.