Vera binpaykerdişê heqan û  tecrîdê Rayberê Şarê Kurdî Abdullah Ocalanî 27ê teşrîna peyêne ya 2020î ra nata 287 rojî yo tepişteyî grevê vêşanîye de yê. Tepişteyê nêweşî zîndanan de nênê tedawîkerdene û rewşa înan vera bena giranêr. Nê nêweşan ra yew zî Saadete Îdîn a ke Zîndanê Şirnexî de tepişîyena. Saadeta ke serrêke û nême ra nata tepişte ya cezaya zîndanî ya 14 serran û 6 mengan dîyaye ci.

Dadîya Saadete Alîye Îdîn derheqê rewşa kênaya xo û grevê vêşanîye de Jinnewsî rê qisey kerd.

Alîye vist vîrî ke kênaya aye serrêke û nême yo bi hawayêke bêhuqûqî tepişte ya û vat: "Kênaya mi di serrî û nême zîndanê Şakranî de mende. O wext tehlîye bî. Hema serrêke kênaya mi temam nêbîye reyna tepişîyaye. Kênaya mi verê ke tepişîyaye krîz kerd û netîceya krîzî de hetê aye yo rast felç bi. Kênaya mi nêeşkayêne dest û linganê xo bixebitna. Rixmê ney zî Şirnex de polîsî ma gêrayî û înan vat, îfadeyê kênaya şima esto û wa bêra îfade bida. Dima ra zî ameyî kênaya mi berde û tepişnaye.  Îfadeyê kênaya mi zî bi hawayêkê  fermî nêame girewtene. Seba ke nêweşe bîye gereka nêameyêne tepiştene. Kênaya mi nêeşkayêne qisey bikera û rayîr a şêra. Bi hawayêke bêhuqûqî a tepişîyaye. Kênaya mi rê 14 serrî û 6 mengî ceza dîyaye

Nika kênaya mi hetê aye yo rast baş nîyo. Aye dir baş eleqedar nêbenê. Doktoran vato, ganî emarê aye bêro antene. La seba ke nêweşxane de emar çin o, kênaya mi reyna erşawîyaya zîndan. Kênaya mi mengêke de hîrê rey ameye berdene bi nêweşxane. Hewteyî de di-hîrê rey zî ameye berdene bi doktorê zîndanî. Seba vîrûsê korona nêeşkena tim şêra nêweşxane. Wexto ke şina kenê karantîna. Kênaya mi nêeşkena xizmetê xo bikera. Embaza aye xizmetê ci kena. Ez seba nêweşîya kênaya xo qerqilîyena. Ganî tedawîye ci teber de bêra kerdene. Tutê ma heme bêsûc ê."

Alîye, bale ante serê grevê vêşanîye û vat: "Kênaya mi, mi ra nêvana ke kewta grevê vêşanîye. Labelê wexto ke ma şinê pêvînayîş, ma ferq kenê ke grev de ya. Çalakîya verîne de zî aye ca girewtebî. O wext zîndanê  Şakranî de bî. Hema ke zerar nêresayo tutanê ma wa waştişê înan bêrê caardene. Bi girankerdişê tecrîdî tehdîdê serê înan zêde bîyo. Ma tutê xo seba ke Erdogan înan rê zulm bikero nêardê dinya. Ma tutê xo seba ke bikerê zîndanan pîl nêkerdê.''

Alîye da zanayene ke ganî tecrîdê serê Abdullah Ocalanî bêro wedarnayene û vat: "Wa heme dadîyî vera tecrîdî vengê xo berz bikerê û destê xo bidê serê wîcdanê xo. Ganî dadîyî bi xoverdayîşê xo na gonî vindarnê û tecrîd peynî bikerê.  Vengdayîşê ma hukmatî rê oyo ke peynîya zulmî bîyaro. Ma cuyêka azad û têduşte wazenê. Kezeba ma dadîyan veşena."