Dadîyê şingalijî: Dewleta tirke şerêkê bêexlaqî kena

Dadîyanê şingalijan vat dewleta tirke bi hawayêkê bêexlaqî vera gerîlayan şer kena û bêvengîya dewletan a vera şuxilîyayîşê çeka kîmyewîye nêrazîbîyayîşê xo mojna.

Dewleta tirke ya îşxalkere 23ê nîsane ra nata bêmabên hêrişê waranê Zap, Metîna û Avaşînî yê Herêmanê Pawitişî yê Medya kena û nê hêrişan de çeka kîmyewîye û gazê jehrînî şuxilnena. HPGyî da zanayene ke dewleta tirke menganê peyênan de 323 reyî pê çeka kîmyewîye hêrişê waranê gerîlayan kerdo. 

Dadîyan şingalijan derheqê babete de ANFyî rê qisey kerd. 

Dayîke Şemê Remo pare kerd ke destpêk de pêro şehîdê têgêrayîşê azadîye yad kerdî û vat: ''Dewleta tirke pê çekanê xo pê gerîlayan nêeşkaye û dest eşt çeka kîmyewîye. Pê nê çeke dana koyanê Rojawan, Mexmûr û Şingalî ro. Şar ganî vera nê hêrişan bihêzêr bo. Ma soz danê şehîdanê xo ke xo rêxistin bikerê û xeyalanê înan bîyarê ca. Dewletê xerîbî vera şuxilîyayîşê çeka kîmyewîye bêveng ê. Ma venga pêro dewletan danê ke wa bêrê koyan, cigêrayîşan bikerê.''

Dayîke Kinê Xidir vat: ''Dewleta tirke şerêkê bêexlaqî kena. Dewleta tirke hêrişê îradeyê gerîlayan kena. Dima ke înan dî bin kewtî çeka kîmyewîye xebitnaye. Eke heqê merdiman estbîyêne 6 mengî yo vera domananê ma çeka kîmyewîye nêameyêne xebitnayene.Ma venga her kesî danê ke vera nê kerdişan cade têbigêro.''