Cinîyî Roja Dadîyan de semedê haştîye vejîyayî waran
Mersîn û Îstanbul de dadîyî bi wesîleya Roja Dadîyan bi şîarê 'Dewlete çend ma asteng bikera zî, ma do xo ver bidê' vera hêrişanê îşxalî yê dewleta tirke û hemkarîya PDKyî vejîyayî waran.
Mersîn û Îstanbul de dadîyî bi wesîleya Roja Dadîyan bi şîarê 'Dewlete çend ma asteng bikera zî, ma do xo ver bidê' vera hêrişanê îşxalî yê dewleta tirke û hemkarîya PDKyî rayîr a şîyî.
Înîsîyatîfê Mayanê Haştîye yê Îstanbulî, MATUHAY-DER û ANYAKAY-DERî bi wesîleya roja Dadîyan qezaya Sancaktepe de şayîyêke kerde. Mayê Haştîye, endamê Nobeta Edaletî, dadîya Denîze Poyraz Fehîme Poyraz, dadîya Sêvê Demîr Sakîne Demîr, aktîvîstê TJA, Endamê HDP û HDKyî, Vervatoxa Meclîsê Cinîyan ê HDPyî Ayşe Acar Başaran, keyeyê Roboskî û xeylêk kesî tewrê şayîye bîyî.
Dadîya Denîze Poyraz, Fehîme Poyraz şayîye de qisey kerd û vat: ''Dewlete çend ma asteng bikera zî, ma do xo ver bidê. Ma do sereyê xo nêarê war.''
Dima Înîsîyatîfê Mayanê Haştîye yê Îzmîrî Behîye Yalçin qisey kerd û bale ante ser ke pêro dinya seba şerê Ukrayna-Rûsya vengê xo vejena la seba kurdan bêveng a. Yalçine vat: ''Barzanî domananê ma kişeno. Sey dadîyan ma do vera nê zulmî têkoşîn bikerê.''
Dadîya tepişteyî Fince Akman zî bale ante hêrişanê îşxalî ser û vat: ''Ma do rêçê şehîd û domananê xo de şorê. Barzanî nêşermayeno domananê ma kişeno?''
Şayîye de hunermende Dengbêje Xalîde vejîyaye sehne ser. Dima dadîyan bi slogananê sey 'Şerî rê ney, haştîye nika', 'Biciwîyo xoverdayîşê zîndanan', 'Cinîye, Cuye, Azadîye' çalakîya rayraşîyayîşî kerde.
Başarane çalakîye ra dima qisey kerd û pare kerd ke îqtîdarê AKP-MHPyî mesuldarê nê şerî yo û vat: ''Bêrê ma pîya nê şerê gemarinî vindarnê. Ma pîya vinderê û têkoşînî pîl bikerê.''
Mersîn de zî pê beşdarîya MEYA-DER, TUHAY-DER, TJA, Meclîsê Cinîyan ê HDPyî çarçewa Roja Dadîyan de şayîyêke ameye kerdene. Cinîyan şayîye de vera sloganî vatî û dowîzî kerdî berz. Dima dadîyan eşkerayîyêke daye. Meclîsê Mayanê Haştîye yê Adana ra Şemse Bagdu vera hêrişanê îşxalî yê dewleta tirke û hemkarîya PDKyî nêrazîbîyayîşê xo mojna û vat: ''No şero gemarin hînî biqedo. Hînî bes o.''
Girseyî dima ver bi Rêxistina HDPyî çalakîya rayraşîyayîşî kerde. Dima derheqê Mayanê Haştîye û Mayanê Laçiksipîyan de sînevîzyonêk ame mojnayene û denbêjî vejîyayî sehne ser.
