Wekîla HDPyî ya Amedî Dersime Daga ke derheqê polîtîkaya hêrişkar e ya vera ciwanan û cinîyan de ANFyî rê qisey kerd, ard ziwan ke têkoşînê cinîyan û ciwanan tersê îqtîdarîyo û vat ê do vera zextan peyser game meerzê.

Dage vat: ''Tradîsyonê ma de xora xoverayîş esto. Ma zî wayîrê nê mîrasî vejîyenê û vera zextanê îqtîdarî têkoşîn kenê. Îqtîdar bi heme hêzê dewlete çar perran ra hêrişê ma keno. Endamê ma yê ciwanîye tim hetê MÎTî ra yenê remnayene, yenê destbenderdene û seba ajanîye bikerê yenê tehdîtkerdene. Endamê ma yê ke nêameyî destbendkerdene nêmendî. Nê hêrişê înan eşkera ramojnenê ke senî têkoşînê ciwanan ra tersenê. Îqtîdar wazeno ke têkoşînê rêxistinkerdeyî yê ciwann bişikno û polîtîkaya leymine ya şerî vila bikero. Wazenê ciwanan asîmîle bikerê, ajan bikerê  û bikerê mîyanê fûhûş û madeyê kundoxî. Bitaybetî cinîyan ê ciwanan ser polîtîkayê leyminî yenê rayraberdene. Ma sey Meclîsê Ciwanîye yê HDPyî seba ke vera zextan têkoşîn kenê, hedefê îqtîdarî de yê. La ê se kenê wa bikerê qet yew zext nêeşkeno ma têkoşînî ra dûrî bifîno. Ma do çirey peyser game mêerzê. Ma de sey tim têkoşîn bikerê û peynî de ser bikewê.

Îqtîdar daha zaf cinîyan ê ciwanan hedef geno. Rojanê peyênan de operasyonê ke vera Meclîsê Ciwanîye û TJA benê paçeyê na polîtîkaya leymine yê. Îqtîdar hukm û medya zî vera ma şuxulneno. Seba ke her kes HDP de xo rehet îfade keno, ciwanî ameyoxê xo tîya vînenê. Îqtîdar zî coka hêrişê ma keno. Pê nê opersyonan vanê qey eşkenê ma bivindarnê. La no cehdkerdişê înan veng o. Ma do sey tim vengê şarî esas bigerê.  Sey HDPyî planê ma yo amedekerde esto. Ma 8ê sibate de  do programê xo yê têkoşînî yê neweyî eşkera bikerê. Babetê bingeyêne na kampayaya tecrîd, grevê vêşanîye, dewaya Kobanê û qerarê MHME yê. Ma do her platform de waştişanê şarî biyarî ziwan û têkoşînî rê dewam bikerê.''