Dayîkanê laçiksipîyanê ke di rojî cuwa ver vernîya banê AKP’yî de semedê haştîye çalakîya roniştişî viraşte hetê polîsan ra bi îşkencekerdişî ameyî destbendkerdene. Nê dayîkan ra Aysel Tûfane derheqê qewimîyayîşî de nê vatî:

'Ma 11 dayîkê laçiksipîyî semedê haştîye waşt ke vernîya banê AKP’yî de ronişê. Gama ke ma resayî verê banê AKP’yî polîsan dormeyê ma girewt û hêrişê ma kerd. Ma bi erdî ra kaşkerdişî destbend kerdî. Polîsan vernîya banî de û wesayît de  ma rê îşkence kerd. Nêngî ke ma rê çînayî, heqaretê ke ma rê kerdî, nînan ra ma şarmîyayî la ê nêşarmîyayî. Ma zî domanê ke vînîbîyayeyê û tepişteyê ma înan wazenê. Polîsan bi hawayêkê wehşîyî hêrişê ma kerd û ma destbend kerdî. Polîsanê ke ma derb kerdî ma tehdît kerdî û va: ‘‘Ê ke şima linganê xo derg bikerê ma do linganê şima bişiknê. Wa her kes naye hol bizanê ke ma polîsanê Erdoganî ra nêtersenê.‘

Ma Pêro Pîya Semedê Haştîye Mucadele bikerê

Dayîke Tûfane vist vîrî ke Serokkomaro Tirk Erdoganî dayîkê ke vernîya banê HDP’yî de ê pîroz kerdî û dayîkê ke haştîye wazenê dayî destbendkerdene û wina va: ‘‘Keyeyê ke vernîya banê HDP’yî de wa berê ma pêro pîya vernîya banê AKP’yî de ronişê. Ma nêwazenê ke kes bimiro. Ma haştîye wazenê. Ma wayîrê îradeyê xo vejîyenê. Ma zî dayîk ê. Zerrîya ma zî vêşena. Soylû û Erdogan bi hesranê sexteyan dejanê dayîkan goreyê menfeatê xo şuxulnenê. Ey Erdogan ma ameyî verê banê ti bîyê memanê to. La to herinda ma goştarîkerdiş de polîsanê to hêrişê ma kerd. AKP adirê şerî gur keno. HDP her tim semedê haştîye û hûzûrî mucadele keno. Wa ê dayîkî bêrê ma pêro pîya semedê haştîye tê bigerê.‘‘