Dayîkanê Şemeyî seba aqûbetê kesanê ke bi zor ameyê vînîkerdene bimusê û kiştoxî bêceza nêmanê hewtoyo 744’in de waşt Meydanê Galatasarayî de çalakîya xo bivirazê. Polîsan sey hewteyanê bînan destûr nêda. Dayîkî mecbûr mendî ke verê banê Beşê ÎHD’yî yê Stenbolî de çalakîya xo virazê. Vernîya çalakîye polîsan kuçeyî girewtî binê ablûqa.

Merdimanê vînîbîyayîyan tîşortê ke fotografê vînîbîyayîyan ser o yê dayî xo ra û qerefîlî berz kerdî. No hewte aqûbetê Ahmet Demîrayî yo ke 21’ê Temmuza 1994’î de amebi destbendkerdene û dima amebi vîndîkerdene persayî. 

Eşkerayîya nê hewteyî Sereka Beşê ÎHD’yî ya Stenbolî Gulseren Yolerî  wende. Parlamenterê CHP’yî yê Stenbolî Sezgîn Tanrikulu zî seba ke teberê welat de yo mektube şawite.  Yolerî ziwan ke bêvengîya vera vîndîbîyayîyan adetê serdestanê Tirkîya yo û no adetê sucdarîye vera hemwelatijan dewam keno û no hêz û keyfê serdestan zêde keno.  Dimayê qiseykerdişî Gulseren Yolerî, mektuba Parlamenterê CHP’yî yê Stenbolî Sezgîn Tanrikuluyî hetê avûkatê keyeyê Demîrayî ra ameye wendene. Tanrikuluyî mektuba xo de da zanayene ke seba qedênayîşê binpankerdişê heqanê merdiman ganî serrastkerdişê qanûnî bêrê kerdene û seba naye zî îradeyo sîyasî û cimatkî hewca keno.