Arîfe Bekîr kitabê 'Efrîn: Cenetî ra ver bi Cehenemî' de zulmê vera kurdanê Efrînî, wextê Îdareyê Xoserî de vurîyayîşê Efrînî û binê îşxalê tirkan de rewşa nikayêne ya Efrînî ser o qal kena.
Arîfe Bekîr dadîyêka efrînij a. Dayîke Arîfe wextêk hetê rejîmê Baasî ra tepişîyabî û maruza îşkenceyî mendî. 2018 de zî wextê îşxalê Efrînî de aye xo ver da. Dayîke Arîfe serebûtê xo, macerayê xo 2020 de kitabê bi nameyê 'Efrîn: Cenetî ra ver bi Cehenemî' de ardê pêser.
Dayîke Arîfe ard ziwan ke îlanê Îdareyê Xoserî seba Efrînî bi dewrêko newe. Dayîke Arîfe vat: ''Dewleta tirke 2018 de hêrişê Efrînî kerd, ma 58 rojan vera înan xo ver da. Xeylêk dejê ma yê giranî estê. Mi kitabê xo de mexdûranê nê îşxalî reyde qisey kerd û hîkayeyê înan nuştî. Embazanê ma semedê nuştişê nê kitabî ez teşwîq kerda. Mi waşt wa hayîya her kesî pê biheso ke Efrînî çi dejî antê. Kurdî verî zî zaf reyî ameybî qetilkerdene. Tewr peyên Efrîn, Şingal, Girê Sipî û Serêkanîyê de xeylêk dejî ameyî antene. Mi waşt nê çîyan binusa.
Kitabê mi erebkî ya, mi kurdkî nênuşt. Çunke dewletanê kolonyalîstan qetî nêverda ma bi ziwanê xo biwanê û binusê. Mi dibistan de bi erebkî wend û erebkî nuşt. Ez do kitabê xo biaçarna kurdkî, îngilîzkî û ziwananê bînan. Armancê mi oyo ke ez dejê şarê xo, hêrişanê dewleta tirke yê vera Efrînî biresna pêro dinya.''
