Seba ke PDK paştî dano hêrişê îşxalî yê dewleta tirke yê vera Kurdîstanî her hetî dinya ra vengê nêrazîbîyayîşan berz beno. Bitaybetî dayîkî vera xayînîya keyeyê Barzanî zaf hêrsbîyaye yê. Endamanê Înîsîyatîfê Dayîkanê Haştîye veng da PDKyî ke wa na xeletîye ra peyser agêro.

Dayîkan ra Mevlude Atsiz vera hamkarîya Barzanî ya bi dewleta tirke hêrs û dejê xo ard ziwan û vat: ''Keyeyê Barzanî sey kurdan tênêgêreno. Eke înan de biney kurdîtîye bibîyêne wina nêkerdêne. Dewleta tirke û Barzanî vera kurdan bîyî yew. Semedê Barzanîyan şerm o ke semedê îxalkerdişê welatê xo paştî danê dişmenî. Ganî Başûr de zî hinî dayîkî wirzê payan ser û vera xayînîya Barzanîyan vejîyê. Kurdîstan de rayîrê dişmenî akenê ke qicanê kurdan bikişê. Vera nê bêveng mendiş eyb o. Ganî dayîkê başûrijî mesajêk bidê Barzanîyan. Ma dayîkî ganî bibê yew, destê yew bînan bîgêrê û verê hêrişê dewleta tirke û Barzanî bîgêrê.''

Dayîke Sultane Altan zî vist vîrî ke dewleta tirke bi paştdayîşê Barzanîyan qicanê kurdan qetil kena û vat: ''Nameyê a herême Kurdîstan o. Ganî îdareyê ci zî goreyê ci têbigêro. Ganî Barzanî nê şerê gonînî ra destê xo bianco. Barzanî yo ke vano ê do pisîngê Kurdîstanî zî çewî medê nêşarmîyeno wina rayîr dano dewleta tirke. Ma tîya ra veng danê dayîkanê Başûrê Kurdîstanî; ganî semedê qedînayîşê nê şerî ê zî wirzê payan ser û berpirsîyarî bîgêrê.''