Ambargoyê serê Kampa Koçberan a Şehîd Rustem Cûdî ya Mexmûrî nizdê 50 rojî yo dewam keno. Çalakîya roniştişî ya Dayîkanê Haştîye yê Mexmûrî ya ke semede wedartişê ambargoyî yena viraştene, kewte roja 4’ine.

Dayîkanê Haştîye yê Mexmûrî ra grûbêk 4 rojî cuwa ver waşt ke vera ambargoyî şirê Hewlêr û îdarekaranê Asayîşê Hewlêrî dir pêvînayîş viraze. La dayîkî dekewtişê bajarî de hetê hêzanê asayîşî ra ameyî vindarnayene û raştê hêrişî ameyî. Naye ser ra dayîkan dest bi çalakîye kerdbi. Dayîkê ke  a roje ra nate çalakîye de yê ard ziwan ke heta wedartişê ambardoyî ê do çalakîya xo rê dewam bikerê. Dayîkan veng da PDK’yî û waşt ke na xeletî ra agêrî.

Dayîkan ra Meryem Kara va: ‘‘Ma wayûbirayî, heme Kurdî yew e. Bê ma kesê ma çîn o. Nê ambargoyî ma ser ra wadarê. Asayîş destûr ma nê dano. Nêweşê ma, cinîyê diganî, domanî rayîr de manenê û mirenê. Kampe de derman nêmend. Destûr nêdanê derman zî bêro.‘‘

Dayîke Şerbet Salîh Wan zî nê vatî:‘‘Îdareyê Başûrî wa nê caardişan ma ser ra wedaro. Wa amborgoyî wedarî. Ma Dayîkê Haştîye yê. Ma şer nêwazenê, ma semedê haştîye tîya yê. Heta ke waştişê ma nêro ca ma do çalakîya xo rê dewam bikerê.‘‘

Hemşaredara Kampa Şehîd Rustem Cûdî ya Mexmûrî Leyla Arzû ya ke pîya bi dayîkan çalakîye de ya, aye zî nê vatî:‘‘45 rojî yo ke berê Hewlêrî ma rê ameyî qefilnayene. Ma waşt ke îdarekaranê Hewlêrî de pêvînayîş bikerê la asayîş destûr nêda. Ma zî tîya dest bi çalakîye kerde. Ma wazenê ke ambargo bêro wedartene. Bêhuhûqîye ke vera ma benê wa bero wedartene. Heta ke na polîtîkaya dişmenkî ya vera ma ra nêro caverdayene do çalakîya dewam bikero.‘‘