Dayîkê ke xoverdayîşê vera qeyûmî de vernî de ca gênê vera xespkerdişê îradeyê şarî hêrsê xo wina ard ziwan û va: Ma vera na neheqîye keyeyan xo de bêveng nêmanenê, ma kuçeyan de bi pêrodayîşê xo cewabê xespkeran danê û şaredarîyanê xo înan rê nêverdenê.
Dayîkê ke tim nobeta xoverdayîşî ya Mêrdînî de yenê têhet û vera xespkerdişê şaredarîyanê Amed, Wan û Mêrdînî wayîrê îradeyê xo vejîyenê da zanayene ke heta ke ê heqê xo peyser megêrê do mudadeleyî rê dewam bikerê. Dayîkê ke tim raştê hêrişê polîsan yenê vat ma cop û gazê înan ra nêtersene û xoverdayîşê xo rê dewam kenê.
Ma Şaredarîye Bi Gonîya Xo Girewte
Dayîkan ra Sureyya Yilmaz a ke roja verêna ra mîyanê xoverdayîşî de ya vat: ‘‘A şaredarîye ya ma ya, ma şaredarîye bi gonîya xo, keda xo girewte. Nika vanê qey ma înan rê verdênê. La ma heta çilka peyêne ya gonîya xo wayîrê şaredarîya xo vejîyanê û înan rê canêverdenê.‘‘
Tîya Cayê Pîrikanê Ma yo
Ayten Gunaye zî nê vatî: ‘‘Ma kesêko nêvîjnayo nêwazenê. Tîya cayê pîyê min o, cayê pîrikanê min o. Ma tîya kesêkê xerîbî nêwazenê. Ma herra xo de xo bî bi îdare kenê. Ma tîya qeyûman nêwazenê, wa şirê welatê xo îdare bikerê. Ma bi mucadeleyê xo wayîrê îradeyê xo vejîyenê.‘‘
Ganî Mucadele Bêro Girdkerdene
Şukrîye Ogmenî zî vera qeyûman hêrsê xo ard ziwan û va : ‘‘ Vera xespkeridşê îradeyî ganî mucadele bêro girdkerdene. Ma qeyûman nas nêkenê cayê înan tîya çîno. Ê peynîya tewr peynî de do şirê.‘‘
Wa Kes Sîstemê Hemserekîye rê Ziwanê Xo Derg Nêkero
Havlet Oncu zî xespkerdişê şaredarîyan sey bêhuqûqîye û bêadaletîye name kerd û va: ‘‘ Ma semedê nê şaredarîyan keda zaf girde daye. Ganî ê bişermê û sîstemê hemserekîye rê ziwanê xo derg nêkerê. Ma destûr nêdanê ke ê keda ma pûç vejê. Heta peynîye ma do kuçeyan de bê.‘‘
Hûma Kesêko Bêveng Maneno Hesnêkeno
Dayîkan ra Sebaht Irmake zî vat: ‘‘Ez ewro semedê gonîya ke semedê destkewteyanê ma rişîyaye tîya ya. Kurdî destkewteyanê xo gonîya ciwanan rê deyndarê. Ma vera nê hêrişan bêveng nêmanenê. Mi dest ra çîyêk mero zî ez yena tîya hêrsê xo vera rîyê înan ana ziwan. Ev vera zulmî de ya, neheqîye qebûl nêkena. Werte de neheqîya girde esta, ganî her kes wirzê lingan ser. Hûma kesêko bêveng maneno hesnêkeno. Ganî vera neheqîye bêro vejîyayene.‘‘
Xoverdayîş û Mucadele Qederê Kurdan o
Ayşe Samane zî ard ziwan ke xoverdayîş û mucadeleyê qederê Kurdan de esto û va: ‘‘Ez ewro semedê xoverdayîşî ameya tîya. Qicanê mi semedê nê destkewteyan bedelê girdî dayî ez ewro weyîrê keda înan vejîyena. Ez vera neheqîye bêveng nêmanena, kuçeyan de bi pêrodayîş cewab dana.‘‘
