Hêrişê dewleta tirke yê pê çekanê kîmyewîyan dewam kenê la hêzê mîyanneteweyî vera qetilkerdişê kurdan bêveng ê. Kurdîstanijî her ca de vera hêrişan payan ser ê. Qezaya Silopî ya Şirnexî de pê rayraşîyayîşêkî hêrişî ameyî şermezarkerdene.

Dayîkê Haştîye ke Êlih, Sêrt, Mêrdîn, Nisêbîn, Şirnex û Qoserî ra ameyî verê Berê Sînorî yê Xabûrî  tîya de çalakîye kerde. Rayraşîyayîş de slogana ''Wa bimiro xîyanet'' bîye berz. Bi nameyê dayîkan Esmere Çekmeze tîya qiseykerdişêk kerd.

Çekmeze vat: ''Êyê ke qala muslumanîye kenê nê qirkerdişan nêvînenê? Na muslumanîye ya? No edelat o? Başûrê Kurdîstanî de wayûbirayî wayûbirayî kişenê.  Şima îşkenceyê ke vera qicanê ma benê nêvînenê? Hûmayî ra bitersê. Ma sey Dayîkanê Haştîye wazenê wa no şer hinî biqedîyo. Beno ke nê îşkenceyî siba qicanê şima rê bêrê kerdene. Êyê ke  qicanê ma mirênenê û bedenê înan kenê lete mela ê zî dejê ma biancê. Ma qicê xo seba ke ê qetil bikerê pîl nêkerdî. Nê cendirmeyê ke tîya de yê ê zî  qicê dayîke xo yê. Çi heqê şima esto şima cendirme û gerîlayan yewbînan rê danê mirênayene. Şima panc kuruş danê cendirmeyan û verdenê qicanê ma ya. Çîyo ke şima vera ma kenê mela Hûma şima rê meverdo.''