Herêmanê Zap, Avaşîn û Metîna de xoverdayîşê gerîlayanê azadîye vera hêrişanê artêşa tirke ya îşxalkere dewam keno. Gerîlayê YJA-Starî yê Avaşîn de şer kenê, xo amade kenê ke menga 6. ya xoverdayîşî pêşwazî bikerê.

Gerîlaya YJA-Starî Delîla Yusufa ke çarçewa Hemleya Şorişgêre ya Bazanê Zagrosî de şerê herêma Avaşînî de ca gêna ANFyî rê  qala çalakîyanê sûîkastî yê Merwanosî kerde.

''Dişmenî verî bi giranî dabi waranê Merwanos ûn Mamreşoyî ser. Mamreşo de dişmen vera derbanê embazan de neçare mend ke xo apey bigêro. Dima vera 7 embazê ma gazê kîmyewî şuxilîyayî. Wexto ke Merwanos de hêrişan dest pêkerd, semedê cewabdayîşî sere de Fermandare Ronahî, embazê Ekîne û Asya xeylêk embazî têgêrayî. Şehadetê Merwanosî qey ma bîyî hêrsêko pîl. Semedê qesasê embazan ma waşt ke çalakîyan bikerê. Ez bi xo o çax Merwanos de sekban bîya û mi têgêrayîşê dişmenî kefş kerdêne. O çax ma tunelan de şer kerdêne.Warê tunelan zehmet bi. Leşkerî tîya de dest bi dest şîyêne. Înan nêzanayêne le do se bikerê. 

Teqîbê înan ra dima mi çalakîya verêne ya suîkastî kerde. Dima na çalakîye dişmen kerd panîk û vila bîyî. Tunelanê şerî ra dûrî kewtî. Avantajê ma no bi ke ma hem zereyê tunelî de hem zî teber de da înan ro. Gerîlayê YJA-Starî hînî vera dişmenî hêrsbîyaye bîyî. Ma waşt dişmen nê erdî ra vejê.

Dişmenî çalakîya suîkastî ra dima yewinê xo yê taybetî war de ca kerdî. No ca warê ma bi û wexto ke vurîyayîşêko qij zî bibîyêne ma hîs kerdêne. Keşfê destpêkî ma cayê nê yewinan keşf kerdî. Dima ma çalakîya diyîne ya sûîkastî kerde. Tîya de nêzdîbîyayîşê leşkeran ê bi cenazayan xeylêk bala ma ante.. Rojan ra dima ê ameyî, înan cenazayê xo erdî ra kaş kerdî û wina berdî. Ma pê çimanê xo dî ke ê verê embazanê xo de hende bêhûrmet bîyî.

Çalakîyanê suîkastî bi taybetî dişmenî rê tesîrêko giran kerd. Ê nêeşkayî tesbît bikerê ke fîşekî kamcayî ra yennê û hertim tersayêne. Coka wextoo ke nînan ra yew merdêne bi panîkî vila bîyêne. Nê çalakîyî bîyî sebeb ke dişmen xo erdî ra apey bigêro. Embazan hem zere hem zî teberê tunelan de da înan ro û coka dişmen nêeşka tîya de ca bibo.''