Hetkarê Hemserekanê Pêroyîyan ê DEM Partî Tayyîp Temelî bi wesîleya Roja Rojnamegerîya Kurdan eşkerayîyêke daye. Eşkerayîye wina ya:

''Rojnameyê Kurdistanî 22yê Nîsana 1898î de Qahîreyî de hetê Mîqdat Mîdhed Bedirxanî ra ame vetiş. No rojname seba Kurdan warê roşnvîrî, hişmendîya netewî û xoverdayîşê seyyewbînîye û azadîye de bîyo gamêka pîle. No rojnameyo ke çapemenîya Kurdkî û cuya entelektuel a Kurdan de xeylêkî muhîm o çi heyf o ke surgunîye de mîyanê şertanê zehmetan de ame vetiş û raştê xeylê tedayan ameyo. Dûrê welatî de amebo vetiş zî çimeyê xo heqîqetê Kurdistanî ra girewto û raştîya şarê Kurdî ardo ziwan. 

Rojnameyê Kurdistanî semedê nê hetê xo rojnameyêkî ra ata, bîyo nameyê heqîqetêkî ke 127 serrî verê ney Rojhelato Mîyanên de hemverê înkar, îmha û çinhesibnayîşî de şewq dayo. Coka roja vetişê rojnameyî yanê 22yê Nîsane serra 1973yî ra nata sey Roja Rojnamegerîya Kurdkî yena pîrozkerdene. 127 serrî yo ke rojnamegerê Kurdî heme hêrîş û astengîyan het de zî xo ver danê û rayîro ke Mîqdat Mîdhed Bedirxanî akerd seba rojnamegeranê Kurdan bîyo rayîrê heqîqetî. Rojnamegerê Kurdî yê ke heqîqetî nusnenê hem bîyê şahidê tarîxê xoverdayîşî hem zî bîyê parçeyêk nê tarîxê xoverdayîşî. Nê semedî ra înan xeylê berdêlê giranî dayê. 

No heqîqeto ke destpêka seserre de vejîyayo werte tarîyîya serranê 90î de helwêstê xo pawito û serranê 2000î de zî rayberîya vurîyayîş û ravurîyayîşê sîyasî kerdo. Na rayîrvanîya ke bê mabeyn ver bi heqîqetî şina ewro her çar hetê Rojhelato Mîyanên û Kurdistanî de ravurîyaya hêzo vatedar yê Aştî û Komelê Demokratîkî. Nê semedî ra Roja Rojnamegerîya Kurdkî tena rojêka roşanî nîya, na roje bîya sembola xoverdayîş û têkoşînê heqîqetî. Roja Rojnamegerîya Kurdkî taybetî awankerdoxê Rojnameyê Kurdistanî Mîqdat Mîdhed Bedirxan û heme xebatkaranê çapemenîya Kurdkî rê pîroz ba. Ma şexsê Musa Anter, Gurbetellî Ersoz, Nagîhan Akarsel, Cîhan Bîlgîn û Nazîm Daştan de heme şehîdanê çapemeniya azade bi rêzdarî yad kenê.''