Komîsyonê Ziwan, Kultur û Hunerî yê DEM Partî bi wesîleya 15ê Gulane Roşanê Ziwanê Kurdkî eşkerayîya nuştekîye daye û nê vatî:

''15ê Gulana 1932î roşnvîrê kurd Celadet Alî Bedirxan û embazanê ey Şam de Kovara Hawarê weşînayî. Na roja tarîxî, serra 2006î de sey Roşanê Ziwanê Kurdkî ame îlankerdiş û na serre ra nika yeno pîrozkerdiş. Kurdanî çar hetanê dinya de nê roşanê xo yê neteweyî bi coş û kelecanêko gird, bi hişmendî û giyanê têkoşînê pawitiş û averberdişê ziwanê Kurdkî pîroz kenî. 

Seserra 21î de xeylî welatanê dinya de seba polîtîkayanê yewperest û netew-dewlete, bedilnayê goristanê ziwanan. Pergalê netew-dewlete ya ke dişmenî demokrasî yo, bi polîtîkayanê qirkerdişê kultur û ziwanan cuya yewperestî ser şaran ferz kerdo. Bêguman kurdan bi tu awayî destûr nêdayî ke nê polîtîkayanê yewperestî pê bêrî û ziwanê Kurdkî werte ra bêro hewanayîş. Şarê kurdî her tim seba pawitişê ziwanê xo xover dayî û tu ray nêveradayî ke ziwanê Kurdkî bêro vîrakerdiş. Verba heme polîtîkayanê çinkerdişî, şarê kurd, bi waştişê azadîya kultur, ziwan û nasnameyê xo têkoşînê pawitiş û averberdişê ercaneyîşanê xo yê neteweyî kerdo û no têkoşîn hema zî domneno. 

Rêzdar Abdullah Ocalan zî bi xususî dîyar keno ke: “Meseleya ziwanê dayîke qasî nan û awe avzel a. Tu ziwanê dayîke bêmusî, perwerdeyê ci nêvînî tu nêeşkenî raşt û baş bifikirî, nêeşkenî hilberînî awan bikerî, wina nêbo sey ke mezgê to merdo. Ziwan resnayîşê destpêkî û sereke yê komelkîbîyayîşî yo. Wayîrvejyayîşê ziwan û kulturê xo, averberdişê înan avzelîyêkê merdimbîyayîşî yo. Ê ke nêeşkîyayî ziwanê xo ra wayîr bivejî nêeşkenî ti çikî ra wayîr bivejî. Ê ke ziwanê xo nêzanenî û bi aver nêberî nêmmerdim manenî; nêeşkenî bi tu kesan rê raşt û durist têkilîyan zî ronî û bi aver bibî. Seba ke ziwan û kulturê ma ameyî qedexekerdiş ma têkoşînêko gird aver berd. Wayîrvejyayîşê ziwan û kutlturê xo ra wezîfeya heme kesan o.”

Ewro bi milyonan domanê Kurdî yê ke no welat de cuyenî, heqê xo yê perwerdeyê bi ziwanê dayîke bêheq ê. Halbûkî no heq, heqê bingeyî û gerdûnî yo û bi zaf pêameyîşanê mîyanêneteweyî de ameyo mîsogerkerdiş. Seba ke dewleta Tirkîya goreyê pêameyîşê gerdûnî yê ke îmze kerda hereket nêkena, nê nêzdîbîyayîşê rayedaranê Tirkîya beno semedê problem û pêkewtişê komelî. Hetanî ke hema heq û azadîyê şarê kurdî yê kulturî, ziwan û nasnameyî ke heqanê tewr rewa û bingeyî yê, bi qanûnan bêrê mîsogerkerdiş, şarê kurd do heme qadanê cuya de têkoşînê xo yê kultur, ziwan û nasnameyê azade de bi israr bo.

Ziwan nîşaneya nasname û statuyê sîyasî yê şaran o. No ser zî, lazim o ziwanê Kurdkî bibo ziwanê fermî û perwerdeyî. Şarê ma do seba ke qedexeyê ser ziwanê Kurdkî bi peynî bikerî û perwerdeyê bi ziwanê dayîke bi qanûnan bêrê mîsogerkerdiş têkoşînê xo xurt bikerî, vernî xoasîmîlasyonî bigêrî û rayîr nêdo polîtîkayanê asîmîlasyonî. 

Roşanê Ziwanê Kurdkî do verba polîtîkayanê asîmîlasyonî û qirkerdişê kulturî, ziwanî û komelî de bibo destpêkê gamanê şorişgerî û çimeyanê hişmendî, estbîyayîş û xobîyayîşî. Bi dirûşmê: “Statuyê Bi Kurdkî, Perwerdeyê Bi Kurdkî’ ma Roşanê Ziwanê Kurdkî Celadet Alî Bedirxan û embazanê ey rê û heme xebatkaranê ziwanê Kurdkî rê pîroz kenê.''