Wexto ke merdim vano dengbêjî, vernî de dengbêjê Botanî yenê vîrê merdimî. Botan pê denbêjan û xoverdayîşê xo şinasîyeno. Bi serran o herêma Botanî de şer, kiştiş û qetlîam peynî nêbîyê. Vera nê caardişan xoverdayîş zî her ke şîyo zêdîya. Dengbêjê herême zî bi deyîranê xo herême de bîyî vengê şarî û dej, kêfweşîyê xo bi deyîran vatî. Naîle Tuncer(58) zî nînan ra yew a. Naîle ma rê qala cuya xo kerde û bale ante girîngîya dengbêjîye ser.

Naîleya ke domanîya xo de pê zorî dîyaye zewijnayene û her wext raşta zor û zehmetîyan ameya, wina qala xo kena: "Domanîye de cuyêka ma ya xozayî estbî. Ez dadîya xo reyde şîyêne mîyanê erdan û mi hetkarîya ci kerdêne. Keyeyê mi pê zorî ez zewşjnaya. Mi qebûl nêkerdêne. Mi nêzanayêne zewaj çi yo. Mi zewajî ra dima cuya xo ra çîyêk fam nêkerd. Mi cuyêka zehmete derbaz kerde. Mêrdeyî mi rê zaf zulm kerdêne la mi xo ver dayêne.''

Naîle qiseykerdişê xo rê wina dewam kena: "Domanîya ma de kaset û plakî estbî. Keyeyê mi kasetan ra deyîran goşdarî kerdêne û mi zî înan dir goşdarî kerdêne. Mi nê deyîrî hezber kerdêne. Mi tim mîyanê cinîyan de deyîrî vatêne. Mi veyve û hênîyan de dengbêjîye kerdêne. Nika ez 8ê Adare û Newroze deyîran vana. Mi domanîya xo de tim goş dayêne Meryeme Xan û Ayşe Şan ser. Ez tewr zaf Ayşe Şan ra hes kena. Dengbêjîye kulturê ma yo. Ganî her kes wayîrê kulturê dengbêjîye vejîyo."

Naîle îfade kerd ke dengbêjîye cuya aye de wayîra cayêkê girîngî ya û vat: "Ganî ma kulturê xo yê dengbêjî xo vîra nêkerê û wayîrê ci vejîyê. Çunke dengbêjîye parçeyêkê kulturê ma yê kurdan o. Ganî pêro ciwan û cinî wayîrê dengbêjî vejîyê. Kulturê dengbêjîye ma rê kal û pîran ra menda. Wexto ke zerrîya mi pir bena ez dengbêjîye kena û zerrîya xo rehet kena. Eke mi dengbêjîye nêkerdêne ez do bimerdêne. Dengbêjîye hizûr dana mi."