Aktîvîstanê Têgêrayîşê Cinîyan ê Azadan (TJA), Rêxistina 'Cinîyî Pîya Bihêzêr ê' ya Îzmîrî, Rêxistina HDPyî ya Îzmîrî serrgêra qirkerdişê ci de Denîze Poyraz warê Cumhurîyetî de eşkerayîyêke daye çapemenîye.

Wextê eşkerayîye de pankarta bi nuşteyê 'Wext wextê ci yo ke ma Denîze bîyarê' ameye akerdene û sloganê sey 'Cinîye, Cuye, Azadîye', 'Denîze Poyraz serewedaritişê ma ya' ameyî vatene.

Dadîya Denîze Poyraz Fehîme Poyraz, keyeyê aye, wekîlê HDPyî Ayşe Acar Başaran, Gulîstane Kiliç Koçyîgît û xeylêk cinîyî tewrê yadkerdişî bîyî.

Dîdare Gul Rêxistina 'Cinîyî Pîya Bihêzêr ê' ya Îzmîrî ser o qisey kerd û vat: ''Ma do her ca de vajê Denîze Poyraz, ma de edaletî tim biwazê. Serrêke nê hezar serrî zî derbaz bibê ma do nê têkoşînî ra amegêrê.''

Gulîstane Kiliç Koçyîgît zî îfade kerd ke têna pê cezakerdişê kiştox Onur Gencerî nêbeno ganî her keso ke HDPyî krîmînalîze keno, bêro cezakerdene. Koçyîgîte vat: ''Şima nêeşkenê pê qirkerdiş û tedayan ma çin bikerê. Heta ke ma qirkeran ra hesab bipersê têkoşînê xo rê dewam bikerê. Ne HDP, ne cinîyî ne zî kurdî şima ra tersenê. Ma soz da ke Denîze ke wayûbiratî û haştîye bîyarê nê welatî. Se beno wa bibo ma do Tirkîyaya demokratîke biafernê. Roşnîya Denîze do tarîtîya nê welatî roşnî bikera.''

Qiseykerdişan ra dima cinîyan qeranfîlî eştî wartî. Dadî Fehîme Poyraz zî vat: ''Denîza mi, bi hezaran embazê to yê cinîyî est ê.''