Bi wesîleya serrgêra Qirkerdişê Şingalî ke dejo tewr pîl tira cinîyî ancenê Platformê Cinîyan ê Dêrsimî Kuçeyê Sanatî de eşkerayîya çapemenîye daye û hêrişê vera cinîyan şermezar kerd.

Eşkerayîye de pankarta ''Cinîyê ke Şingal, Mereş û Antalya de ameyî qetilkerdene serewedaritişê ma yê'' ameye akerdene. Eşkerayîye hetê Handan Kahraman Şanli ra ameye wendene.

Şanli bale ante polîtîkaya hêrişkare ya îqtîdarî ya ke vera cinîyan yena rayraberdene ser û vat: ''Îqîtdarê AKPyî û dezgehê ci yê camêrd-serdestî hinî têna hêrişê heqanê cinîyan nêkenê, cinîyan qetil kenê. Her rojê kiştiş, taciz û tecawuzê vera cinîyan û domanan zêdîyenê. Tewr peynî de Antalya de Azra Gulendam Haytaoglu û Mereş de Emîne Gokkiz ameyî qetilkerdene. Reyna bajarê ma de domenêka 16 serre hetê leşkerêkî ra ameye tacîzkerdene. Pê betalkerdişê Peymana Îstanbulî verê qetilkerdiş û tecawuzan ame kerdene.''

Şanli  derheqê Qirkerdişê Şingalî de zî nê vatî: ''7 serrî verê cu çeteyanê DAÎŞî Şingal de vera şarê êzidî hêrişê qirkerdişî kerd. 3ê Tebaxa 2014î de netîceya hêrişê çeteyan de bi hezaran êzidîyî raştê qirkerdişî ameyî. A roje 6 hezar cinî û domanî esîr ameyî girewteen û 400 hezar êzidîyî bi zorî erdê ci ra ameyî vetene. Cinî û domanê ke esîr ameyî girewtene raştê îşkenceyê cinsî ameyî û bazaranê koleyan de ameyî rotene. Bi zor dînê înan ame bedilnayene. Nê metodê ke çeteyan şuxulnayî şexsê cinîyan ê êzidîyan de dewamê polîtîkya semedê teslîm girewtişê îradeyê cinîyan û cinîyan rê bîatkerdişî bi.

Ma tîya ra reyna vanê Şingalî ra heta Mereş û Antalya cinîyê ke yenê qetilkerdene serewedaritişê ma yê. Semedê cuyeyêka bêşîdet û seyciye ma veng danê heme cinîyan ke ma têkoşînî pêro pîya pîlêr bikerê. Ma heq û cuya xo û Peymana Îstanbulî canêvedenê.''