Meclîsê Cinîyan ê HDPyî, Têgêrayîşê Cinîyan ê Azadan û Komeleya Cinîyan a Rosa Dêrsim de derheqê Gulîstane Doku û îstîsmaran de bînaya HDPyî ya Dêrsimî de eşkerayîyêka çapemenîye kerde.Temsîlkarê dezgehanê sivîlan, Wekîla HDPyî ya Elîhî Ayşe Acar Başaran, Vervatoxa Meclîsê Cinîyan ê HDPyî Dîlane Dîrayet Taşdemîr, endama Komeleya Cinîyan a Rosa Gulîstane Nazlier û zaf cinîyî zî tewrê eşkerayîye bîyî.

Endama Komeleya Cinîyan a Rosa Gulîstane Nazlier derheqê Gulîstane Doku ya ke 5ê çeleyî ra nata tira xeberêke nêna girewtene de qisey kerd û vat: "Rewşa Gulîstane netîceyê polîtîkayanê şîdetî yê dewlete ya. Gulîstane wendekarêka zanîngehî ya û 10 roj ê ke vînbîyaye ya. Ma tîya ra persenê Gulîstane ça de ya? Heta ke Gulîstane bêra dîyene ma do pers bikerê."

Vervatoxa Meclîsê Cinîyan ê HDPyî Dîlane Dîrayet Taşdemîr zî vat: "Dêrsim de koyî kerrayî zî yenê teqîb kerdene senî 10 roj ê ke Gulîstane nêna dîyene? Ma vanê qey bi hawayêkê cidîyî cigêrayîş nêno kerdene. Derheqê gumandarê yewînî yo ke babîyê ci polîs o de eşkerayîyêka zelale nêna kerdene. Seba Gulîstane nêzdîbîyayîşê înan wina yo; 'Cinîyêka bîye vîn la do bêra vîrkerdene.' Ma do nê serebûtî teqîb bikerê. Ma do destûr nêdê ke no serebût bêro nimnayene.

Tîya de vatişêko namdar esto vano: Kurdîstan de merdimî vîn nêbenê; yenê vînkerdene. Heyfo ke no seba cinîyan zî wina yo. Cinîyî vîn nêbenê; yenê vînkerdene û qetilkerdene. Wazenê ke vengê cinîyan bibirnê. Ma ra kesêke zî do kêm nêba!Hewteyêkî ra nata serebûtê îstîsmarî zî Dêrsim de bîyî zêde. Têkilîya înan a bi polîtîkaya dewlete esta. Keso ke domanî îstîsmar kerdî ame veradayene û reyna domanî îstîsmar kerdî. Na polîtîkayêka sîstematîke ya dewlet a.Ma do vera na polîtîkaya hempare ya camêrdan û dewlete têkoşînê xo zêde bikerê."