Dewa Kîlîse ya qezaya Xozatî ya Dêrsimî de cinîya bi nameyê E. A. (22) hetê camêrd Oktay G. (27)yo ke tede ciwîyayêne ra 7 mengî maruza şîdet, gef û tecawuzî mende. Dima ke cinîye xebere daye babîyê xo serebût eşkera bi.

Gerreyê babîyê E.A. ra dima Oktay G. hetê cendirmeyan ra ame destbendkerdene. La E.A. semedo ke tersayêne gerreyê xo apey girewt û Oktay G. pê bira 'dûrkerdişî' vera dîya.

Platformê Cinîyan ê Dêrsimî E.A. 14ê gulane de zîyaret kerde. E.A. zîyaret de cinîyan rê wina qala serebûtî kerde: ''Înan Oktay ver da. Ez şîya Nêweşxaneyê Dewlete yê Dêrsimî û mi raporê derbe girewt. Oktayî bi şewan ez oda de kilît kerdêne û pê zîncîran linga mi bestêne. Ez tim maruza şîdet, tecawuz û gefan menda. Rixmo ke ma pîya ciwîyayêne Oktayî nêverdayêne ez dadî û babîyê ey reyde qisey bikera.''

E.A. vizêr reyna Xozat de gerreyê Oktay G. kerd û camêrd reyna ame destbendkerdene. Oktay G. fermandarîya cendirmeyan de tepişîyeno.

Platformê Cinîyan ê Dêrsimî da zanayene ke semedê E.A. paştdayîşo huqûqî û psîkolojîk do bêro dayene.