Dêrsim de Komeleya Paştdayîşê Cinîyan a Roja Newîye Meydanê Seyîd Rizayî de eşkerayîya çapemenîye daye û bale ante ser ke wendekarê meseleya cayê mendişî ancenê raştê tacîzî yenê.

Eşkerayîye de pankarta bi nuşteyê 'Zanîngeh de, kuçeyan de, wargehan de cinîyî payan ser o yê' ameye akerdene. Rêxistinê cinîyan û wendekarê zanîngehî tewrê eşkerayîye bîyî. Sereka Komele Çagla Yolaşan eşkerayîye wende.

Yolaşane da zanayene ke wendekarê cinîyê ke teber de mendî muracatê înan kenê û beyan kenê ke raştê tacîzî yenê. Yolaşane vat: ''Wendekaran wexto ke hêzanê asayîşî rê gerre kerd, înan îma kerd ke ê ney heq kenê. Tay wendekarê cinîyî zî cayanê mendişî yê demkîyan de maruzê tacîzî bîyî la selahîyetdaran na mesele peygoş kerde.

Wargehê wendekaran cayanê tewr dûran ê şaristanî de yê. Wendekarî wexto ke şinê wargehî rayîran de maruzê tacîzî benê. Ma her roje xebera tacîzî gênê. Ma vera nê tacîzan hetê cinîyan de yê. Ma her ca de û her saete de heqê 'şaristanê azadî de ciwîyayîşî' medê xespkerdene.''