Şerwananê YPJyî Ronahî Xebat û Dîcle Tirbespiyê derheqê hêrişanê dewleta tirke ya îşxalkere de ANFyî rê qisey kerd.

Ronahî Xelat 3ê sibata 2022yî de dewa Xerezê ya Amûdê de hêrişê dewleta tirke de birîndar bîye û lingêka xo vînî kerde.Ronahî Xelet Serêkaniyê, Cezaa, Mebrûka, Reqa, Tebqa û Minbic de vera DAÎŞî tewr xeylêk hemle bîye.

Ronahî wina qala prosesî kerde: ''2013 de Serêkanîyê de vera El Nûsra mi şer kerd. Armancê El Nûsra esîrkerdişê cinîyan bi. La şerwananê YPJyî bi giranî xo ver da û ma hemleya xo ser viste. 2014 de Hemleya Şehîde Rûbare dîyaye destpêkerdene û ez zî tewra hemle bîya. Ma set cinîyanê YPJyî îradeyê cinîyan ê kurdan mojna her kesî.  Xeylêk embazê ma heta nefesê xo yê peyênî şer kerd û şehîd bîyî. Cezaa û Mebrûka de zî ma şer kerd. Dima ez tewra Hemleya Reqa bîya û 5 mengan vera DAÎŞî şer kerd. Na hemle de zaf reyî hêzê ma ame dîyene. Îrade û hêzê ma dêsêko ke nêrijîyeno, asinêko ke nêşikîyeno.

Cerganê DAÎŞî hêrişê Zîndanê Sînaa yê Hesekê kerd. 121 embazê ma tîya de bi qehremanî şehîd bîyî. Ez zî wexto ke şîyêne merasîmê şehîdan 3ê sibata 2022yî de dewa Xerezê de bombarduman de birîndar bîya, lingêka mi, destê mi ra şîya. Dewleta tirke bi nê hêrişî xîret kerd ke qesasê DAÎŞî ma ra bigêra. Pêro dinya zanena ke armanc û waştişê dewleta tirke ya îşxalkere çita yı. Erdogan têna wazeno ke serkêşanê têkoşînê vera DAÎŞî îmha bikero, DAÎŞî gandar bikero. Têkoşînê ma newe nîyo, bi serran o ma têkoşîn kenê. Coka ma do qetî têkoşînê xo ra anêgêrê.''

Dîcle Tirbespiyê dadîya domanêk a û Îdareyê Meclîsê Leşkerî yê Qamişloyî de wezîfe kena. A tewra hemleyanê Til Hemîs, Til Berak, Cezaa, Hesekê, Kobanê, Girê Spî, Silûk, Minbic û Şengalî bîye. 3ê gulana 2022yî de zî Qamişlo de bîye hedefê hêrişê dewleta îşxalkere. A derheqê ê helan de wina vana: ''Wexto ke ez pa embazan şîyêne wezîfe Qamişlo de hêrişê ma ame kerdene. Nê hêrişî de şerwana YPJyî Mizgîne Botan û welatperwere Kesra Melek hetê dewleta tirke ra ameye qetilkerdene. Heman hêrişî de mi wird lingê xo destî ra dayî.

Dewleta tirke hol zanena ke cayêk de cinîyî est bê azadî, cuye, têdûştî û edalet zî est o. Dewleta tirke wazeba şexsê cinîyan de Şorişê Rojawanî çin bikera. Dewleta tirke verî zî xeylêk reyî hêrişê cinîyan kerd. Dewleta tirke bi hêrişanê droneyê çekdarî fermandarê ma Sosine Bîrhat, Ronahî Kobanê, Dîlare Heleb, Jîyane Tolhildan, Roje Xabûr û Barîne Botan qetil kerd. Dewleta tirke wazena şarê Rojawanî qir bikera, coka hêrişê sivîlan kena. Sey şerwananê YPJyî se beno wa bibo ma do şarê xo bipawê.''