Goreyê ajansê Mezopotamya sîyasetmedare Ayla Akat zî tede deyîr û govenda bi kurdkî ra ceza dîyaye 51 tepişteyan ê cinîyan ê Zîndanê Sîncanî. Derheqê 51 cinîyan de bi bahaneya ke 15ê tebaxe de govende girewte û deyîrî vatî, tehqîqat dîya destpêkerdene.

Tehqîqatî ra veradayîşê Hanime Yildirim, Jîyane Ateş û Rojdane Erez ame astengerdene. Roniştişê hakîmîya înfazî de Dîlbere Tanrikulu vat: ''Ma kurd ê, ma bêrê kiştene zî ceza bigêrê zî ziwanê ma yê dayîke kurdkî ya.''

Ayla Akat Ata zî îfade kerd ke a roje aye sloganê 'Biciwîyo Serek Apo', 'Bê serek cuye nêbena' berz kerdî û vat: ''Mi verî zî nê sloganî vatêne. Ez pê bawer a ke prosesê çareserîye do reyna bêro caardene û ê do Ocalanî reyde tewrê prosesî bibê.''

Eke Hakîmîya Înfazî cezaya serê 51 cinîyan betal nêkera cinîyî do muracatê Mehkemeya Cezaya Girane bikerê.