Platformê Seba Cinîyan ê Têdûştîye (EŞÎK) Raporê Teqîbê Meclîsî yê 16ê Gulane-15ê Hezîrane eşkera kerd. Rapor de ame vatene ke rojdemê sey Peymana Îstanbulî, şîdetê vera cinîyan, binpaykerdişê heqanê cinîyan Meclîs de zaf nêameyî qiseykerdene.

EŞÎKî Raporê Teqîbê Meclîsî de bale ante ser ke 22 kombîyayîşanê grûbe yê Meclîsî de nameyê cinîyan derbaz nêbenê û partîyan têkoşînê Peymana Îstanbulî kerd milê cinîyan. Rapor de ame vatene ke derheqê caardişê Peymana Îstanbulî de mesuldarîya Meclîsî dewam kena. EŞÎKî da zanayene ke Komîsyonê Şîdetî yê Meclîsî mesuldarîya xo nêarde ca coka rêxistinanê cinîyan  û partîyê HDP, CHP û ÎYÎ Partî komîsyonî ra xo apey ant. 

Rapor de nê doneyan ca girewt:

-22 kombîyayîşan de nameyê cinîyan derbaz nêbîyî

-68 pêşnîyazanê qanûnan ra têna 3ê ci derheqê têdûştîya cînsîye ya komelkîye ser o yê.

-124 cigêrayîşanê Meclîsî ra têna 5ê ci de nameyê cinîyan ca girewt.

-Hezar û 567 vernîyazanê persan ra têna 50ê ci derheqê meseleyanê cinîyan de bîyî.

-154 kombîyayîşanê çapemenîye de rêna 7ê ci de qala Peymana Îstanbulî û şîdetê vera cinîyan ameye kerdene.